Bakı, 6 dekabr, AZƏRTAC

Qərbi azərbaycanlıların doğma yurdlarına ləyaqətli qayıdışı artıq beynəlxalq məsələyə çevrilib. Bu, təkcə Azərbaycanı deyil, dünyanı maraqlandıran məsələdir. Azərbaycanın fəallığı, siyasi-diplomatik fəaliyyəti nəticəsində Qərbi azərbaycanlıların qayıdışı məsələsi artıq ölkəmizin hüdudlarını aşıb. Beynəlxalq təşkilatlarda da Qərbi azərbaycanlıların doğma yurdlarına qayıdışı ilə bağlı fikirlər səsləndirilir.

Bu fikirləri AZƏRTAC-a açıqlamasında Sosial Tədqiqatlar Mərkəzinin sektor müdiri, Qərbi Azərbaycan İcmasının Ziyalılar Şurasının üzvü Əfqan Vəliyev bildirib.

O deyib ki, Qərbi azərbaycanlıların doğma torpaqlarına qayıdışı tarixi zərurətdir: “Bu torpaqlar tarixən Azərbaycan torpağı olub. Azərbaycanlılar orada yaşayıb, böyük mədəni irs ərsəyə gətiriblər. Təəssüflər olsun ki, Ermənistan hökuməti Qərbi azərbaycanlıları deportasiya etdiyi dövrlərdə onlara aid maddi-mədəni irs nümunələrini, tarixi abidələri də məhv edib. Bir çoxunu mənimsəyib, dağıdıb, Yer üzündən silib, özününkünləşdirməyə çalışıb. Hətta toponimləri də dəyişib. Bu mövzuda keçirilən beynəlxalq tədbirlər Qarabağa qayıtdığımız kimi, Qərbi Azərbaycana da dinc və ləyaqətli qayıdışımızı təmin edəcək. Bu, prosesin sürətlənməsinə töhfə olacaq”.

Sektor müdiri deyib ki, Qərbi Azərbaycan məsələsinin ölkə hüdudlarını aşması beynəlxalq ictimai rəyə də müsbət təsir göstərəcək. “Belə tədbirlər dünya ictimaiyyətinin Azərbaycanın haqq səsinə dəstəyini də gücləndirəcək. Uzun illər torpaqları işğal altında qalan, torpaq həsrəti yaşayan soydaşlarımız Qarabağdakı tarixi Qələbəmizdən sonra öz yurdlarına qayıdırlar. Növbəti ideoloji hədəf və strategiya Qərbi azərbaycanlıların tarixi dədə-baba torpaqlarına qayıtması məsələsidir. Bu, ümummilli məsələyə çevrilib. Soydaşlarımızın Qərbi Azərbaycana ləyaqətli şəkildə dönməsi üçün addımlar atılır. Keçən dövr ərzində Qərbi Azərbaycana qayıdış istiqamətində çox mühüm işlər görülüb, Qərbi Azərbaycan İcması yaradılıb. Həmçinin dünya ictimaiyyəti Qərbi azərbaycanlıların üzləşdiyi haqsızlıqlar barədə məlumatlandırılır, kitablar yazılır və xaricdə yayılır”, - deyə o əlavə edib.