Qətərin Vaqif bazarında trüfel sərgisi açılıb
Qahirə, 28 dekabr, AZƏRTAC
Qətərin məşhur turistik məkanlarından sayılan Vaqif bazarında (Suq Vaqif) trüfel sərgisi və bazarı açılıb.
AZƏRTAC Qətərin “The Peninsula” nəşrinə istinadla xəbər verir ki, sərginin ilk günündə Əlcəzair və Səudiyyə Ərəbistanından gətirilən 150 qutu ağ və qəhvəyi trüfellər nümayiş etdirilib.
Sərginin meneceri Camal İbrahim Al İshaq bildirib ki, yaxın həftələrdə sərgiyə İraq, Suriya və İrandan da qiymətli göbələklər gətiriləcək. İraqdan 500-600 əlavə qutu trüfelin gətiriləcəyi gözlənilir.
Nəşrin bildirdiyinə görə, hazırda ağ trüfellərin (zubaidi) 1 kiloqramının qiyməti 165-330 dollar arasında dəyişir. Qəhvəyi "Ikhlasi" adlandırılan trüfelin 1 kiloqramının satış qiyməti 42 dollardan başlayır.
“Faqqa” adlanan bu göbələk körfəzdə yerləşən ərəb dövlətlərində, xüsusilə Qətər mətbəxində çox populyardır. Bu trüfellər yeməli göbələklərə aid olduğundan onun əsasında bir çox qurmanın yüksək qiymətləndirdiyi ləziz yeməklər hazırlanır. Bu göbələklərin spesifik ətri və müalicəvi xüsusiyyətləri var.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
