Qida zəhərlənməsi diaqnozu ilə xəstəxanalara yerləşdirilmiş 78 nəfər evlərinə buraxılmışdır
Bakı, 23 avqust (AZƏRTAC). Avqustun 22-də saat 13:00-dan etibarən, ümumilikdə, 78 nəfər ürəkbulanma, qusma və yüksək hərarət şikayətləri ilə Siyəzən Müalicə Diaqnostika Mərkəzinə, habelə Şabran Mərkəzi Rayon Xəstəxanasına müraciət etmişdir.
Səhiyyə Nazirliyinin mətbuat xidmətindən AZƏRTAC-a bildirmişlər ki, bunlardan 62 nəfəri (18-i azyaşlı uşaq olmaqla) Siyəzən Müalicə Diaqnostika Mərkəzinə, 16 nəfəri isə Şabran Mərkəzi Rayon Xəstəxanasına yerləşdirilmişdir.
Qida zəhərlənməsi diaqnozu qoyulmuş vətəndaşlara ilkin tibbi yardım göstərilmiş və dərhal hadisə barədə Səhiyyə Nazirliyinin 113 xidmətinə məlumat verilmişdir. Bununla əlaqədar Bakıdan Siyəzən xəstəxanasına sanaviasiya ilə mütəxəssislər ezam olunmuşdur. Müraciət edənlərə ilkin tibbi yardım göstərilmiş və onlar evlərinə buraxılmışlar.
Zərərçəkənlərin hamısı Şabran rayonunun Ağbaş kəndinin sakinləridir və onlar Siyəzəndəki “Çıraqqala” şadlıq sarayında toy məclisində olmuşlar.
Sanitariya-epidemioloji xidmət orqanları tərəfindən həmin restorandan yeyinti nümunələri götürülmüşdür.
Bölmənin digər xəbərləri
