QIRĞIZISTANIN CƏNUBUNDA DİNDAR EKSTREMİSTLƏRİN LİDERLƏRİ HƏBS EDİLMİŞLƏR
AZƏRTAC İnterfaks agentliyinə istinadla xəbər verir ki, Qırğızıstanın cənubunda Hizbut-Təhrir dini-radikal partiyasının Uzgen rayonundakı özəyinin lideri Xeyrulla Koçkorov və onun köməkçisi həbs edilmişlər. Oş vilayəti daxili işlər idarəsinin məlumatına görə, X.Koçkorovun evində aparılan axtarış zamanı “Əl-Vai” jurnalının 12 nüsxəsi və ekstremist məzmunlu daha 48 nəşr tapılmışdır. Tutulmuş digər şəxsin evindən eyni məzmunlu 17 vərəqə və “Əl-Vai” jurnalının 5 nüsxəsi müsadirə olunmuşdur.
Hər iki şəxs əvvəllər Qırğızıstan Respublikası Cinayət Məcəlləsinin 299-cu maddəsi ilə (millətlərarası dini ədavətin qızışdırılması) məhkum edilmişdir.
Koçkorov dindirilən zaman bildirmişdir ki, o, hər hansı konkret hakimiyyət nümayəndələrinə qarşı çıxmamış, yalnız Qırğızıstanda islam dövləti yaratmağa çağıran vərəqələr yayırmış.
