Qoşulmama Hərəkatına daxil olan onlarla ölkə Fransanın neokolonializm siyasətinə məruz qalıb - ŞƏRH
Bakı, 22 noyabr, AZƏRTAC
Qoşulmama Hərəkatı ölkəmizin rəhbərliyi ilə tarixinin ən məhsuldar dövrünü yaşayır. 2019-cu ildən ötən müddətdə Hərəkat daxilində dünyada mövcud olan bir çox problemlərə dair müzakirələr aparılıb, məsələlərin həlli istiqamətində layihə və təkliflər irəli sürülüb. Azərbaycanın sədrliyinin ilk illəri COVID-19 pandemiyasının yayılması və onunla mübarizə dövrünə təsadüf etsə də, ölkəmizin bu müddətdə irəli sürdüyü təşəbbüslər yekdilliklə dəstəkləndi, beynəlxalq əməkdaşlıq imkanları yaratdı. COVID-19 pandemiyasına qarşı mübarizə üzrə Təmas Qrupunun yaradılması, 2020-ci il mayın 4-də sammit səviyyəsində görüşün, eyni zamanda, Qoşulmama Hərəkatının sədri kimi Prezident İlham Əliyevin təşəbbüsü ilə 2020-ci il dekabrın 3-4-də BMT Baş Assambleyasının COVID-19 pandemiyasına qarşı mübarizə üzrə xüsusi sessiyasının keçirilməsi, BMT-nin İnsan Hüquqları Şurasında, Baş Assambleyasında “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə layihələrinin irəli sürülməsi və qəbulu kimi addımlar təşkilatın beynəlxalq nüfuzunu əhəmiyyətli dərəcədə yüksəldib.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
O qeyd edib ki, sədrliyi müddətində Azərbaycan Hərəkatın təsisatlanması istiqamətində də mühüm addımlar atıb. Belə ki, təşkilatın vahid loqosunun və bayrağının təsdiq edilməsi ilə bağlı proses başlatmaqla yanaşı, məhz dövlətimizin başçısının təşəbbüsləri əsasında Hərəkata üzv dövlətlərin dəstəyi ilə 2021-ci il oktyabrın 4-5-də Qoşulmama Hərəkatının Gənclər Şəbəkəsi, 2021-ci il noyabrın 28-də isə Parlament Şəbəkəsi təsis olunub. 2021-ci il oktyabrın 11-12-də Serbiyanın Belqrad şəhərində Qoşulmama Hərəkatının təsis edilməsinin 60-cı ildönümü münasibətilə yüksək səviyyəli yubiley tədbiri, Bakı şəhərində “Qoşulmama Hərəkatının təkamülündə Afrika irsi” mövzusunda konfrans, eyni zamanda, ilk dəfə üzv ölkələrdən gənclərin iştirakı ilə Qoşulmama Hərəkatı Modeli simulyasiya təlimi təşkil edilib. Prezident İlham Əliyevin Sərəncamı ilə təşkilata üzv ölkələrin onlarla gəncinə hər il Azərbaycanda təqaüdlə təhsil almaq imkanları yaradılıb. Bütün bunlar Azərbaycanın liderlik qabiliyyətinin, təşkilat daxilində inteqrasiyanın, əməkdaşlığın inkişafında, dünyada qlobal problemlərin həllində oynadığı rolun göstəricisidir. Elə buna görə də Hərəkata sədrliyin üç il nəzərdə tutulmasına baxmayaraq, üzv ölkələrin qərarı ilə Azərbaycanın sədrliyi 2023-cü ilin sonuna qədər uzadılıb. Bu da Prezident İlham Əliyevin sözləri ilə desək, “Hərəkata daxil olan ölkələrin Azərbaycanın fəaliyyətinə verdiyi yüksək qiymətin göstəricisidir”.
“Daha bir vacib məsələnin - “Qadınların hüquqlarının inkişaf etdirilməsi və səlahiyyətlərinin artırılması” mövzusunun Azərbaycanın təşəbbüsü ilə ilk dəfə olaraq Qoşulmama Hərəkatında müzakirə edilməsi dövlətimizin insan hüquqlarına, əsasən də onun zərif nümayəndələri olan qadınların hüquqlarının pozulmasının qarşısının alınmasına, onların qorunmasına verdiyi böyük töhfədir”, - deyən politoloq qeyd edib ki, qadın hüquqları özünü “insan hüquqlarının carçısı” kimi göstərməyə çalışan Fransa kimi bəzi ölkələrin müstəmləkə, neokolonializm siyasəti əsasında daha çox pozulur. Həmin ölkələrin insanlıqdan uzaq siyasəti nəticəsində milyonlarla qadın ən fundamental hüquqları olan yaşamaq, normal əmək, təhsil, səhiyyə və digərlərindən məhrum edilərək, ən ağır şəraitlərdə yaşamağa, istismar olunmağa məhkum edilib. Ona görə də Azərbaycan sədrliyi dövründə dekolonizasiya gündəliyinə xüsusi diqqət ayrılmışdı. Fransa kimi neokolonializm siyasəti yürüdən ölkələr qlobal səviyyədə ifşa edilib, bu utancverici praktikaya son qoyulması tələbi səsləndirilib.
“Qoşulmama Hərəkatına daxil olan onlarla ölkə Fransanın müstəmləkəçilik siyasətinə məruz qalıb və bu barbar siyasət nəticəsində milyonlarla insan, o cümlədən qadın və uşaqlar məhv edilib. Bakıda keçirilən “Qadınların hüquqlarının inkişaf etdirilməsi və səlahiyyətlərinin artırılması” mövzusunda müzakirələrin aparılması, Qoşulmama Hərəkatının Qadınlar Platformasının təsis edilməsi dünyada, o cümlədən təsisata üzv ölkələrdə qadın hüquqlarının qorunması istiqamətində fəaliyyətə müsbət təsir göstərəcək.
Azərbaycanın Hərəkata sədrliyi bu il başa çatır. Bu qısa, amma fəal dövrdə Hərəkatın tarixində Prezident İlham Əliyevin sədrliyi ilə bir çox layihələr həyata keçirilib və qərarlar qəbul edilib. Hərəkatın beynəlxalq gücü və təsir imkanları daha da inkişaf etdirilib. Bütün bunlar Azərbaycanın idarəçilik və təşkilatçılıq bacarığının göstəricisi olmaqla, Hərəkata və dünyaya verdiyi böyük töhfədir”, - deyə Y.Hacızadə vurğulayıb.
Bölmənin digər xəbərləri
