Azərbaycan Respublikası Baş Prokurorluğunun mətbuat xidmətindən AZƏRTAC-a bildirmişlər ki, cari ilin birinci yarısında rayon, şəhər prokurorluqları, Bakı Şəhər Prokurorluğu orqanları tərəfindən cinayətkarlığa qarşı mübarizə, qanunçuluğun möhkəmləndirilməsi, insan hüquq və azadlıqlarının qorunması sahələrində görülmüş işlərin vəziyyəti, qarşıda duran vəzifələrin müzakirəsinə həsr olunmuş geniş əməliyyat müşavirələri keçirilmişdir.

Azərbaycan Respublikasının baş prokuroru Zakir Qaralov, müavinlər Rüstəm Usubov və Namiq Əsgərovun sədrliyi, Baş Prokurorluğun idarə və şöbə rəislərinin, tabe şəhər və rayon prokurorluqlarının kollektivlərinin iştirakı ilə respublikanın 7 bölgəsi üzrə Sumqayıt, Şirvan və Mingəçevir şəhərləri, Ağstafa, Şamaxı, Cəlilabad və Ağcabədi rayonlarında, habelə Bakı Şəhər Prokurorluğu orqanları əməkdaşlarının iştirakı ilə keçirilmiş geniş əməliyyat müşavirələrində cari ilin ötən dövrü ərzində qanunçuluğun daha da möhkəmləndirilməsi, dövlətçiliyimizin maraqlarının, insan hüquq və azadlıqlarının müdafiəsi, cinayətkarlıq və hüquq pozuntularına qarşı mübarizə işinin real vəziyyəti, mövcud nöqsanların yaranma səbəbləri hərtərəfli və prinsipial təhlil edilmişdir. Əməliyyat müşavirələrində “Prokurorluq haqqında” Qanunda nəzərdə tutulmuş fəaliyyət istiqamətləri üzrə, ilk növbədə istintaq, dövlət ittihamının müdafiəsi və vətəndaş müraciətlərinə baxılması işinin səmərəliliyinin artırılması, tabe struktur qurumların fəaliyyəti üzərində Baş Prokurorluğun nəzarətinin daha da təkmilləşdirilməsi, prokurorluq orqanlarında xidməti, icra və əmək intizamının yüksəldilməsi üçün konkret tədbirlər müəyyənləşdirilmişdir.

Diqqətə çatdırılmışdır ki, ölkəmizdə həyata keçirilən uğurlu dövlətçilik siyasətinin nəticəsində formalaşan ictimai-siyasi sabitlik ilin birinci yarsında cinayətkarlıq və hüquq pozuntularına qarşı mübarizənin səviyyəsinə də müsbət təsirini göstərmiş, mövcud kriminogen durum daha da sabitləşmişdir. Əvvəlki hesabat dövrü ilə müqayisədə qeydə alınmış qəsdən adam öldürmə, adam öldürməyə cəhd, qəsdən sağlamlığa ağır zərər vurma, zorlama, hədə-qorxu ilə tələb etmə cinayətlərinin, yol hərəkəti və nəqliyyatın istismarı qaydalarını pozma, o cümlədən ölümlə nəticələnən yol- nəqliyyat hadisələrinin sayı əhəmiyyətli dərəcədə azalmış, adamların girov götürülməsi kimi cinayətlər ümumiyyətlə qeydə alınmamış, törədilmiş 10338 cinayətin təxminən 90,4 faizinin açılması təmin edilmişdir.

Qəsdən adam öldürmə kimi şəxsiyyət əleyhinə olan təhlükəli cinayətlərə qarşı mübarizə sahəsində həyata keçirilmiş məqsədyönlü tədbirlərin nəticəsidir ki, hesabat dövründə həmin kateqoriyadan olan cinayətlərin sayı 2007-ci ilin müvafiq dövrü ilə müqayisədə 11 hadisə azalmış, qeydə alınmış 73 qəsdən adam öldürmə cinayətinin 65-i və ya 90 faizinin açılması təmin edilmişdir. Həmin dövrdə qəsdən adam öldürməyə cəhd cinayətlərinin sayı 4 fakt azalmış və qeydə alınmış 27 belə hadisənin 26-nın və ya 96,2 faizinin açılması təmin edilmişdir. Müsbət haldır ki, daxili işlər orqanları ilə əlaqəli şəkildə həyata keçirilmiş tədbirlər nəticəsində əvvəlki illərdə Bakı şəhərinin Nərimanov rayonunun, Sumqayıt şəhərinin və Tovuz rayonunun ərazilərində törədilməklə uzun müddət bağlı qalan 3 qəsdən adam öldürmə cinayətinin açılması təmin edilmişdir.

Görülmüş müsbət işlərlə yanaşı, əməliyyat müşavirələrində, həmçinin fəaliyyət istiqamətləri üzrə işin səmərəliliyinə mənfi təsir göstərən hallar ətraflı təhlil və ciddi tənqid olunmaqla, istintaq işi və ibtidai araşdırmaya prosessual rəhbərliyin həyata keçirilməsində, cinayətkar hərəkətlər nəticəsində hüquqi və fiziki şəxslərə vurulmuş zərərin ödənilməsi, vətəndaş müraciətlərinə baxılması, onların qəbulu ilə əlaqədar işin təşkilindəki çatışmazlıqların qısa müddətdə aradan qaldırılması üçün konkret tapşırıqlar verilmişdir.

Diqqətə çatdırılmışdır ki, görülmüş müsbət işlərlə yanaşı, 2007-ci ilin müvafiq dövrü ilə müqayisədə ötən altı ayda ölkə üzrə qeydə alınmış ağır və xüsusilə ağır cinayətlərin 25, az ağır cinayətlərin 9,9, adam oğurluğu cinayətlərinin 2,1 dəfə, oğurluq cinayətlərinin 41, dələduzluq cinayətlərinin 20,1, soyğunçuluq və quldurluq cinayətlərinin müvafiq olaraq 66 və 50, yetkinlik yaşına çatmayanlar tərəfindən törədilən cinayətlərin 30,3, insan alveri ilə bağlı cinayətlərin 76,8 faiz artmasına dair statistik göstəricilər ciddi müzakirə mövzusu olmalı, bu kateqoriyadan cinayətlərin profilaktikası istiqamətində zəruri qabaqlayıcı tədbirlər görülməlidir.

Hesabat dövründə qəsdən adam öldürmə cinayətlərinə qarşı mübarizə sahəsində zəruri tədbirlərin həyata keçirilməsinə baxmayaraq, 8 qəsdən adam öldürmə hadisəsinin, o cümlədən Gəncə və Şirvan şəhərlərində, Bakı şəhərinin Nəsimi rayonunda, Abşeron, Yardımlı, Goranboy, Lənkəran və Qəbələ rayonlarının hər birində 1 belə cinayətin bağlı qalması həmin cinayətlərin açılması üçün zəruri istintaq və əməliyyat-axtarış tədbirlərinin görülməsinə ciddi ehtiyac yaradır.

Diqqətə çatdırılmışdır ki, prokurorluğun fəaliyyət istiqamətləri üzrə işin səmərəliliyinin artırılması məqsədi ilə rayon və şəhər prokurorluqları digər hüquq-mühafizə orqanları ilə birlikdə artım meyli müşahidə olunan cinayətlərə qarşı qabaqlayıcı, məqsədyönlü tədbirlərin daha da gücləndirilməsi, cari ildə və ötən illərdən bağlı qalan cinayətlərin açılması üçün aparılan zəruri əməliyyat-axtarış tədbirləri üzərində prokuror nəzarətinin günün tələbləri səviyyəsində həyata keçirilməsi, törədilmiş və ya hazırlanan cinayətlərə dair daxil olan məlumatların vaxtında qəbulu, qeydə alınması və həlli zamanı cinayət-prosessual qanunvericiliyin tələblərinə dönmədən əməl olunması, cinayətlərin uçotdan gizlədilməsi hallarına qarşı barışmaz mübarizə aparılması, belə qanun pozuntularına yol verən, xüsusilə də əsassız və qanunsuz yoxlamalar aparılmasına cəhd edən işçilər barəsində ən qəti və kəsərli tədbirlərin görülməsi, cinayət təqibinin həyata keçirilməsi ilə əlaqədar ibtidai araşdırmaya prosessual rəhbərliyin keyfiyyətinin yüksəldilməsi, icra və əmək intizamının daha da möhkəmləndirilməsi üçün kəsərli tədbirlərin görülməsi təmin edilməlidir.

Prokurorluq orqanlarının fəaliyyətindəki mənfi təzahürlərə qarşı aparılan prinsipial mübarizə nəticəsində hesabat dövründə müxtəlif pozuntulara və qanunsuzluqlara yol verən 13 prokurorluq əməkdaşının intizam qaydasında cəzalandırılması, o cümlədən 1 əməkdaşın prokurorluq orqanlarından xaric olunması diqqətə çatdırılmaqla, xidməti, icra və əmək intizamının daha da möhkəmləndirilməsi üçün zəruri tədbirlərin görülməsi bütün tabe prokurorlardan tələb edilmişdir.

İstintaq işinin düzgün təşkili ilə əlaqədar qarşıda duran ən əsas vəzifələr müəyyənləşdirilməklə, aparılan ibtidai araşdırmalar gedişində beynəlxalq sənədlərdə və milli qanunvericiliyimizdə təsbit olunmuş əsas insan və vətəndaş hüquqlarının və azadlıqlarının real təmin edilməsi üçün tədbirlərin görülməsinin, bu hüquq və azadlıqlara qəsd edən qanunsuz hərəkətlərin qarşısının vaxtında alınmasının, belə məsələlərdə təqsirkar olan prokurorluq əməkdaşlarının layiq olduğu məsuliyyətə cəlb edilməsinin zəruriliyi vurğulanmışdır. Bildirilmişdir ki, hər bir prokurorluq əməkdaşı vəzifəsindən asılı olmayaraq, birmənalı şəkildə dərk etməlidir ki, onların fəaliyyətinə, ilk növbədə, cinayət təqibi zamanı insan hüquq və azadlıqlarının təminatlarını müəyyən edən qanun normalarına düzgün əməl etmələri əsasında qiymət veriləcəkdir.

İyulun 31-də Azərbaycan Respublikasının baş prokuroru Zakir Qaralovun sədrliyi ilə Baş Prokurorluğun rəhbər heyətinin iştirakı ilə geniş əməliyyat müşavirəsi keçirilməklə, bölgələr üzrə müşavirələrin nəticələri hərtərəfli müzakirə olunmuş, tabe prokurorluqların əməkdaşları tərəfindən qaldırılan problemlərin həlli sahəsində qarşıda duran vəzifələr müəyyənləşdirilmiş, Baş Prokurorluğun əlaqədar struktur qurumlarına konkret tapşırıqlar verilmişdir.