Rizvan Hüseynov: Bu cür sərgilər mədəni diplomatiyanın mühüm alətidir
Bakı, 7 oktyabr, Günel Alıyeva, AZƏRTAC
“Bu cür tədbirlərin keçirilməsi Azərbaycan üçün xüsusi əhəmiyyət kəsb edir, çünki onlar həm kitab mədəniyyətini təbliğ edir, həm də beynəlxalq elmi və mədəni əməkdaşlığı gücləndirir”.
Bu fikirləri tarixçi-alim Rizvan Hüseynov XI Bakı Beynəlxalq Kitab Sərgisi çərçivəsində AZƏRTAC-ın müxbiri ilə söhbətində bildirib.
“Azərbaycan üçün məhz belə beynəlxalq tədbirlərin keçirilməsi strateji əhəmiyyət kəsb edir. İnsanların, xüsusən də uşaqların artıq kitab oxumaması ilə bağlı geniş yayılmış inancın olmasına baxmayaraq, biz, əslində, bunun əksini müşahidə edirik. Sərgi sayəsində hamının - uşaqların, valideynlərin, gənclərin bura gəldiyini görürük. Bu, kitaba marağın olduğunu, mütaliə mədəniyyətinin isə onun rəqəmsallaşmasına baxmayaraq, mövcud olmaqda davam etdiyini göstərir”, - deyə tarixçi qeyd edib.
O qeyd edib ki, son illərdə nəsillər bir-birini əvəz edib və müasir cəmiyyət getdikcə daha çox internet və mobil cihazlardan məlumat alır. Bununla belə, bu kimi təşəbbüslər mənalı mütaliə ənənəsini qoruyub saxlamağa kömək edir.
“Kitablar internetdə olan hər hansı səthi məlumatdan daha dərin və keyfiyyətli bilik mənbəyi olaraq qalır. Bu kimi sərgilər tədqiqata və düşünməyə marağı artırır və beləliklə, düşünən şəxs formalaşdırır”, - deyə o vurğulayıb.
Tarixçi onu da qeyd edib ki, bu formatda keçirilən tədbirlər mədəni diplomatiyanın inkişafına töhfə verir, ona yeni, intellektual xarakter bəxş edir.
“Mədəni diplomatiya dedikdə ən çox konsertlər, festivallar, musiqi layihələrini nəzərdə tuturuq. Amma məncə, elm və düşüncə adamlarını bir araya gətirən, fikir mübadiləsi mühiti yaradan forumlar daha önəmlidir. Məhz bu format Vətənimizə ən böyük fayda gətirir”, - deyə o bildirib.
Nümunə olaraq o, sərgi çərçivəsində “Azərbaycan. Qafqazda erməni məsələləri” monoqrafiyasının təqdimatını göstərib.
“Xüsusi olaraq bu tədbirdə iştirak etmək üçün xaricdən dostlarım - professorlar, tədqiqatçılar Bakıya gəlmişdilər. Bu, əsl mədəni mübadilədir: onları dəvət edərək mən Azərbaycanı kitab, elm, mədəniyyət prizmasından təqdim edirəm. Onlar bizim xalqımız, adət-ənənələrimiz, elmi düşüncə səviyyəsi ilə tanış olurlar. Bu, ölkəni dünyaya tanıtmağın ən yaxşı yoludur”, - deyə R.Hüseynov qeyd edib.
Tarixçi onu da deyib ki, o, kitab üzərində işləməyə 2010-cu illərin əvvəllərində, internetin-məkanın yenicə formalaşdığı vaxtlarda başlayıb.
“Mən müşahidə etdim ki, o dövrdə media sahəsi daha çox erməni təbliğatı ilə dolu idi, öz hekayələrini media, filmlər və elmi nəşrlər vasitəsilə fəal şəkildə təbliğ edirdi. Azərbaycan tərəfi o dövrdə təmsilçilik baxımından geridə qalırdı. Ona görə də kitabımın əsas məqsədi erməni tarixi ideologiyasının elmi tənqidi və akademik Azərbaycan baxışının formalaşmasıdır. Bu əsəri hazırlayarkən mən əsasən müsəlman və assur mənbələrinə istinad edirdim”, - deyə R.Hüseynov bildirib.
Bölmənin digər xəbərləri
