Robert Mobili: Məqsəd Alban kilsəsini saxtalaşdıraraq erməni kilsəsi adı ilə dünyaya tanıtmaq idi
Qəbələ, 18 sentyabr, AZƏRTAC
Azərbaycan Alban-udi xristian dini icması diplomatik korpus nümayəndələrinin işğaldan azad olunmuş ərazilərə səfərinə Ermənistanın göstərdiyi revanşist münasibəti kəskin pisləyib.
İcmanın sədri Robert Mobilinin yaydığı bəyanatda bildirilir ki, dini icma Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura, xüsusilə alban tarixi-mədəni irsinə məxsus Gəncəsər və Xudavəng məbədlərinə səfərinə Ermənistan cəmiyyətində və siyasi dairələrində revanşist əhvali-ruhiyyəli münasibət göstərilməsini qətiyyətlə qınayır.
Bu barədə Qəbələnin Nic qəsəbəsində AZƏRTAC-ın bölgə müxbirinə açıqlama verən Robert Mobili deyib: “Ümumiyyətlə, ermənilərin Alban kilsəsini saxtalaşdırma prosesi işğal zamanı daha intensivləşmişdi. Amma bu siyasətin çox dərin kökləri var. Hətta Çar Nikolayın vaxtına gedib çıxır. İkinci əsas saxtalaşdırma prosesi isə işğal dövrünə təsadüf edir. Ermənilər Qarabağı işğal edəndən sonra böyük məbədləri, xüsusilə Gəncəsər və Xudavəng monastır komplekslərinin, həmçinin Ağoğlanın memarlıq üslubunu dəyişdirməyə, xaç elementləri əlavə etməyə başladılar. Daşların üzərinə xaç yerləşdirdilər. Bu da göstərir ki, saxtalaşdırma məqsədli şəkildə aparılıb.
Ermənistan Alban kilsəsinin böyük hissəsini saxtalaşdırmağa cəhd edib. Məqsəd o idi ki, alban kilsələrini erməni kilsəsi adı ilə dünyaya tanıtsınlar. Ümumiyyətlə, İslam dini ilə bağlı tarixi irsimizə münasibətləri də göz önündə idi. İşğal dövründə məscidlərimizin vəziyyəti hər kəsə məlumdur. Vətən müharibəsi nəticəsində torpaqlarımız işğaldan azad olundu. İndi Azərbaycan dövləti həmin Alban kilsələrini, məscidləri bərpa edir”.
Azərbaycanın Qafqaz Albaniyasının varisi olduğunu diqqətə çatdıran R.Mobili qeyd edib ki, Qafqaz Albaniyası güclü ölkə idi, müstəqil kilsəsi var idi. Azərbaycanda Alban-udi xristian icması da bu kilsənin birbaşa dini varisidir: “Biz çalışırıq ki, bu həqiqəti dünyaya çatdıraq. Həqiqət ondan ibarətdir ki, Alban kilsəsinin nə gürcü kilsəsinə, nə rus kilsəsinə, nə də erməni kilsəsinə heç bir yaxınlığı yoxdur”.
“Ermənilərin din xadimləri, qeyri-hökumət təşkilatları diplomatların azad olunmuş ərazilərimizə səfərinə niyə belə səs-küy qaldırdılar? Çünki Azərbaycanın tarixi-mədəni irsinə sahib olmaq istəyirlər”, - deyən İcma sədri əlavə edib ki, bu gün Azərbaycanda Alban kilsələri ilə yanaşı, digər kilsələr də təmir olunur. Azərbaycanda dini icmalar üçün şərait yaradılır.
“Bunun bariz nümunəsi də Nic qəsəbəsindəki Müqəddəs Məryəm Ana kilsəsidir, hansı ki, Heydər Əliyev Fondu tərəfindən bərpa olundu. Məhz müharibə gedən dövrdə bərpa edildi. Müqəddəs Yelisey kilsəsi, Rus Pravoslav kilsəsi... Bu kilsələr də bərpa olunub. Bu, tarixi həqiqətdir. Bu həqiqətləri turistlər də gəlib öz gözləri ilə görürlər. Sizdən əvvəl Latviya və Litvadan qonaqlar gəlmişdi. Mən onlara da Azərbaycan həqiqətlərini çatdırdım. Bildirdim ki, Azərbaycan müsəlman ölkəsidir, amma burada kilsələr də bərpa edilir. Hətta 44 günlük müharibə dövründə Azərbaycanda məhz kilsə bərpa olundu. Bu da Azərbaycan tolerantlığının bir nümunəsidir”, - deyə o əlavə edib.
Müxbir – Rəşad Türkoğlu
Bölmənin digər xəbərləri
