SİYASƏT
Rumıniya mətbuatı Ulu Öndərlə bağlı məqalə yayıb
![Rumıniya mətbuatı Ulu Öndərlə bağlı məqalə yayıb](/files/2022/3/1200x630/16708529741755044627_1200x630.jpg)
Buxarest, 12 dekabr, AZƏRTAC
Rumıniyanın “News24hours” xəbər portalı Ümummilli Lider Heydər Əliyevin həyat və fəaliyyəti ilə bağlı məqalə yayıb.
AZƏRTAC xəbər verir ki, məqalədə Ulu Öndər Heydər Əliyevin Azərbaycan xalqına və dövlətimizə misilsiz xidmətləri qeyd olunub. Diqqətə çatdırılıb ki, Azərbaycan Cənubi Qafqazın geosiyasi məkanında lider dövlətdir. Məqalədə bildirilir ki, müstəqil xarici siyasətə malik olan Azərbaycan həm ikitərəfli münasibətlər kontekstində, həm də çoxtərəfli əlaqələr fonunda regionunun geosiyasi, geoiqtisadi və geostrateji təhlükəsizliyinə fundamental töhfə verməkdə, qlobal əməkdaşlıqda mərkəzi aktor rolunu oynamaqda davam edir.
Qeyd olunub ki, bütün bunlar Ümummilli Lider Heydər Əliyevin müəyyənləşdirdiyi inkişaf strategiyası və xarici siyasət kursunun nəticəsidir. Ulu Öndərin uzaqgörən siyasətinin nəticəsidir ki, müstəqil Azərbaycan tarixən qısa müddətdə beynəlxalq münasibətlər sistemində layiqli yer tuta bilib, fikrinə hörmət edilən bir ölkə kimi böyük nüfuz qazanıb.
Məqalədə vurğulanıb ki, bu gün Azərbaycan Ümummilli Liderin layiqli davamçısı Prezident İlham Əliyevin rəhbərliyi ilə böyük uğurlar qazanmaqda davam edir. 2023-cü ilin “Heydər Əliyev İli” elan olunması ilə bağlı Azərbaycanda və xarici ölkələrdə keçiriləcək tədbirlər barədə məlumat verilib.
İqbal Hacıyev
AZƏRTAC-ın xüsusi müxbiri
Buxarest