Azərbaycan Baş nazirinin birinci müavini Abbas Abbasov oktyabrın 12-də Moskvada Rusiya xarici işlər nazirinin birinci müavini Valeri Loşşinin ilə görüşdən sonra
AZƏRTAC-ın xüsusi müxbirinə bildirmişdir ki, söhbət zamanı Rusiyada Azərbaycan ilinə və Azərbaycanda gələn il keçiriləcək Rusiya ilinə həsr olunmuş tədbirlər də müzakirə olunmuşdur. İlkin razılaşmaya görə, Rusiyada Azərbaycan ilinin rəsmi bağlanış mərasimi bu ilin dekabrında Moskvada Azərbaycan Prezidenti İlham Əliyevin iştirakı ilə keçiriləcəkdir. Azərbaycanda Rusiya ilinin açılış mərasimini isə 2006-ci ildə Rusiya Prezidenti Vladimir Putinin ölkəmizə rəsmi səfəri zamanı keçirmək planlaşdırılır. İndi Azərbaycanda Rusiya ilinin keçirilməsi planı hazırlanır və gələn ilin fevralında təsdiq ediləcəkdir.
A.Abbasov onu da bildirmişdir ki, Rusiyada Azərbaycan ili kifayət qədər uğurla davam edir və tədbirlər proqramı çərçivəsində hər ay Moskvada və Rusiya bölgələrində sərgilər, “dəyirmi masalar”, iqtisadi seminarlar, konsert proqramları və sair tədbirlər keçirilir. A.Abbasovun fikrincə, Azərbaycan təşkilat komitəsi mədəniyyət, təhsil, gənclər, idman və turizm, iqtisadi inkişaf nazirliklərinin və digər idarələrin yaxından köməyi ilə xeyli iş görmüşdür.
