Rusiyada yaşayan RF vətəndaşlarının sayı 137,9 milyon nəfərdir
Moskva, 16 dekabr (AZƏRTAC). Federal Dövlət Statistika Xidməti (Rosstat) 2010-cu ildə aparılmış Ümumrusiya siyahıyaalmasının son nəticələrini dərc etmişdir.
Rusiya KİV-lərində verilən məlumata görə, 2002-ci ildən sonrakı səkkiz il ərzində Rusiya sakinlərinin sayı 2,3 milyon nəfər azalaraq 142 milyon 857 min nəfər olmuşdur. Eyni müddətdə Rusiyada 8,5 min kənd boşalmışdır.
Əhalinin sayına görə Rusiya Çin (1 milyard 335 milyon nəfər), Hindistan (1 milyard 210 milyon nəfər), ABŞ (309 milyon nəfər), İndoneziya (238 milyon nəfər), Braziliya (191 milyon nəfər), Pakistan (165 milyon nəfər) və Banqladeşdən (147 milyon nəfər) sonra səkkizinci yeri tutur.
RF-də qadınların sayı kişilərin sayından 10,8 milyon nəfər çoxdur. Ölkədə hər min kişiyə 1163 qadın düşür. Bundan əlavə, Rusiya əhalisi qocalmaqda davam edir: ölkə sakinlərinin orta yaşı əvvəlki siyahıyaalmada qeydə alınmış 37,7 yaşa qarşı indi 39 yaş təşkil edir. RF-də 33 milyon ər-arvad yaşayır.
RF-də ən çoxsaylı xalq yenə ruslardır (111 milyon nəfər), lakin son 8 ildə onların sayı 4 milyon nəfər azalmışdır. Bundan əlavə, Rusiyada 5,31 milyon nəfər tatar, 1,93 milyon nəfər ukraynalı, 1,58 milyon nəfər başqırd və 1,44 milyon nəfər çuvaş yaşayır. Bütün bu xalqların nümayəndələrinin sayı azalmaqdadır. Əvəzində Qafqaz xalqlarının - çeçen, avar, ləzgi və inquşların sayı artır. Onların arasında sayca ən çox olan çeçenlərdir - 1,43 milyon nəfər.
Rusiyada yaşayan RF vətəndaşlarının sayı 137,9 milyon nəfərdir. Ölkədə rus dili ilə yanaşı, ən geniş yayılmış dillər ingilis, tatar, alman, çeçen, başqırd, Ukrayna və çuvaş dilləridir.
Rusiyada orta təhsilli sakinlərin sayı 36,7 milyon nəfər, ali təhsillilərin sayı 27,5 milyon nəfərdir. 700 min sakinin isə heç ümumi ibtidai təhsili də yoxdur.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
