SAHİBKARLARA 53,8 MİLYON MANAT GÜZƏŞTLİ KREDİT VERİLMİŞDİR
İqtisadi İnkişaf Nazirliyinin mətbuat xidmətindən AZƏRTAC-a bildirmişlər ki, sahibkarların investisiya layihələrinin güzəştli qaydada kreditləşdirilməsinə cari il üçün dövlət büdcəsindən Sahibkarlığa Kömək Milli Fonduna (SKMF) 74 milyon manat ayrılması nəzərdə tutulmuşdur.
Bu ilin ötən dövründə dövlət büdcəsindən SKMF-in xəzinə hesabına köçürülmüş 53,8 milyon manat respublikanın 51 şəhər və rayonunda 483 sahibkarlıq subyektinin investisiya layihələrinin maliyyələşdirilməsinə yönəldilmişdir.
Ayrılmış kreditlər əsasən sənaye məhsulları istehsalı (94 layihə), kənd təsərrüfatı məhsullarının istehsalı və emalı, kəndli fermer təsərrüfatlarının inkişafı (348 layihə), turizm infrastrukturunun inkişafı (24 layihə), xidmət sahələri (16 layihə) üzrə və digər layihələrin maliyyələşdirilməsinə yönəldiləcəkdir.
Maliyyələşdirilmiş layihələrin 78 faizi regionların payına düşür. Bu layihələrin 85 faizdən çoxu istehsal və emal yönümlüdür.
Cari ilin ötən dövründə verilmiş güzəştli kreditlər hesabına maliyyələşdirilən layihələrin həyata keçirilməsi nəticəsində 5900-dən çox yeni iş yeri yaradılacaqdır.
Bölmənin digər xəbərləri
