ŞAMAXIDA YENİ İŞ YERLƏRİ ARTIR
AZƏRTAC-ın müxbiri xəbər verir ki, son vaxtlar Şamaxıda abadlıq və tikinti işləri ilə yanaşı, əhalinin məşğulluğunun təmin edilməsi məqsədi ilə yeni iş yerlərinin açılması da xüsusi diqqət mərkəzindədir. Regionların sosial-iqtisadi inkişafına dair Dövlət proqramında 2004-2008-ci illərdə rayonda 5 min 200 yeni iş yerinin yaradılması nəzərdə tutulmuşdur. İndiyədək bir sıra yeni xidmət və istehsal obyektlərinin fəaliyyətə başlaması nəticəsində 1000 nəfərdən çox adam işlə təmin olunmuşdur. Bu yaxınlarda istehsal gücü daha da genişləndirilən Şamaxı xalça-trikotaj sexində isə iş yerlərinin sayı artırılaraq 120-yə çatdırılmışdır.
Hazırda Şamaxı şəhərinin aşağı hissəsində televizor zavodunun tikintisi sürətlə davam etdirilir. “Star-inşaat” firması tərəfindən inşa edilən bu müəssisədə müasir standartlara uyğun televizorlar istehsal ediləcəkdir. Zavodun istifadəyə verilməsi ilə burada 400-450 nəfər üçün daimi iş yeri açılacaqdır.
