Səfir Faiq Quliyev: Azərbaycan-Gürcüstan münasibətləri uğurla inkişaf edir
Tbilisi, 18 noyabr, AZƏRTAC
Bu gün Azərbaycan-Gürcüstan diplomatik əlaqələrinin qurulmasının 30 ili tamam olur. Məhz 1992-ci il noyabrın 18-də ölkələrimiz arasında diplomatik əlaqələrin təməli qoyulub. Ötən 30 il ərzində Azərbaycan-Gürcüstan münasibətləri möhkəm dostluq, qardaşlıq və strateji tərəfdaşlıq mühitində, bir-birinə dayaq olaraq inkişaf edib.
AZƏRTAC xəbər verir ki, bu sözləri Azərbaycanın Gürcüstandakı səfiri Faiq Quliyev Azərbaycan-Gürcüstan diplomatik münasibətlərinin qurulmasının 30-cu ildönümü ilə əlaqədar jurnalistlərə müsahibəsində söyləyib.
Onun sözlərinə görə, 1991-ci ildə hər iki ölkənin xalqı yenidən müstəqilliyə qovuşub. Lakin, o dövrdə həm Azərbaycan, həm də Gürcüstanda mövcud olan siyasi gərginlik və xaotik vəziyyət dövlət müstəqilliyimizin möhkəmlənməsində çox böyük maneələr və ciddi problemlər yaratmışdı. Hər iki dövlətin əzəli torpaqları işğala məruz qalmışdı. Buna baxmayaraq, ölkələrimiz arasındakı münasibətlər inkişaf etməyə başladı və bugünkü yüksək, strateji tərəfdaşlıq səviyyəsinə yüksəldi.
Səfir qeyd edib ki, ulu öndər Heydər Əliyevin 1993-cü ildə xalqın təkidli tələbi ilə siyasi hakimiyyətə qayıdışı Azərbaycanın ictimai-siyasi həyatında müsbət dəyişikliklərə səbəb oldu. Eyni zamanda, Azərbaycanla Gürcüstan arasındakı dostluq və qardaşlıq münasibətləri yeni müstəvidə inkişaf etməyə başladı. Ölkələrimiz arasındakı münasibətlərin inkişafının fundamental təməli də məhz Ümummilli Liderin adı ilə bağlıdır. Ulu Öndərin 1996-cı ildə Gürcüstana tarixi səfəri zamanı iki ölkənin həyatında mühüm əhəmiyyət kəsb edən iki sənəd imzalandı. Bu sənədlər əlaqələrimizin inkişafı üçün yeni imkanlar yaratmışdır.
Bildirilib ki, bu sənədlər ötən 30 il ərzində Azərbaycan ilə Gürcüstan arasında iqtisadi sahədə də əlaqələrin inkişafına zəmin yaradıb. Bu gün iki ölkənin iştirak ilə irimiqyaslı meqalayihələr həyata keçirilir və hər iki xalq bu layihələrin bəhrəsini görür. Məhz bu layihələrin nəticəsində Azərbaycan və Gürcüstan dünya miqyasında dayanıqlı inkişaf edən ölkələrə çevriliblər.
Diplomatın sözlərinə görə, bu layihələr davamlı şəkildə yeni mərhələyə qədəm qoyub. Azərbaycan Prezidenti İlham Əliyev cari il oktyabrın 24-də Gürcüstana səfəri zamanı bəyan etdi ki, Azərbaycan və Gürcüstan bu gün yeni regional və transregional iqtisadi layihələrə start verir. Bu yeni bir impulsdur. Bu gün yenə də Azərbaycanla Gürcüstan Avropanın və digər ölkələrin enerji təhlükəsizliyinin təminatçısı kimi çıxış edirlər.
O deyib ki, Azərbaycan dövləti ötən illər ərzində Gürcüstan iqtisadiyyatına 3,5 milyard ABŞ dolları həcmində sərmayə qoyub. Bu göstərici ilə ölkəmiz qardaş Türkiyədən sonra Gürcüstan iqtisadiyyatına sərmayə qoyan ölkələr sırasında ikinci yerdədir.
“Bu gün Gürcüstanda mindən çox Azərbaycan kapitallı şirkət fəaliyyət göstərir. Bu əlbəttə ki, 1996-cı ildə iki ölkə arasında qarşılıqlı investisiyaların qorunması haqqında sazişə əsasən həyata keçirilir”, - deyə F.Quliyev vurğulayıb.
Onun sözlərinə görə, bu gün Azərbaycanda xeyli sayda Gürcüstan kapitallı şirkət fəaliyyət göstərir: “Azərbaycan torpaqlarını işğaldan azad etdikdən sonra “Böyük qayıdış” proqramına start verib. Gürcüstan şirkətləri də Qarabağın yenidən qurulması və reabilitasiya prosesində iştirak edirlər”.
Ölkələrimiz arasında münasibətlərin dərinləşməsində və inkişafında Gürcüstanda yaşayan soydaşlarımızın rolunu yüksək qiymətləndirən səfir deyib: “Bizim möhkəm zəmində qurulan çoxəsrlik münasibətlərimizin başlıca amillərindən biri də burada yaşayan soydaşlarımızdır. Bu gün Gürcüstanda 100 minlərlə tamhüquqlu və bərabər hüquqlu vətəndaşlarımızın yaşaması bizim üçün mühüm əhəmiyyətə malikdir. Əlaqələrimizin inkişafında və daha da möhkəmlənməsində Gürcüstanda yaşayan soydaşlarımızın xüsusi rolu vardır. İstər əvvəlki dövrlərdə, istərsə də son 30 illik münasibətlərimizin möhkəmlənməsində soydaşlarımızın da böyük xidmətləri olub”.
F. Quliyev deyib ki, Azərbaycan dövləti də onlara daim diqqət və qayğı göstərir. Prezident İlham Əliyevin xüsusi tapşırıqlarına uyğun olaraq soydaşlarımıza diqqət və qayğı göstərilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
