Səfir: Heydər Əliyev Azərbaycan-Gürcüstan strateji tərəfdaşlığının banisidir
Tbilisi, 10 may, AZƏRTAC
Azərbaycan-Gürcüstan dostluğunun, strateji tərəfdaşlığının banisi Ulu Öndər Heydər Əliyevin anadan olmasının 103-cü ildönümü Marneulidə qeyd edilib.
AZƏRTAC xəbər verir ki, bu münasibətlə Marneulidəki Mədəniyyət Mərkəzində tədbir və konsert təşkil olunub. Əvvəlcə Azərbaycanın və Gürcüstanın dövlət himnləri səsləndirilib.
Azərbaycanın Gürcüstandakı səfiri Faiq Quliyev çıxışında bildirib ki, bu əlamətdar gün təkcə Azərbaycan üçün deyil, bütövlükdə regionumuz üçün xüsusi əhəmiyyət daşıyan bir şəxsiyyətin həyat yoluna və zəngin dövlətçilik irsinə bir daha nəzər salmaq imkanı yaradır. Gürcüstanda Ulu Öndər Heydər Əliyevlə bağlı bugünkü tədbirin təşkili xüsusi önəm və rəmzi məna daşıyır. Çünki Heydər Əliyev Gürcüstanın böyük dostu, Azərbaycan – Gürcüstan strateji tərəfdaşlığının banisi olub və bu gün bu dostluq, qardaşlıq bütün dünya üçün örnəkdir.
Diplomat deyib ki, Ümummilli Liderin siyasətində gənclərlə bağlı məsələlər hər zaman xüsusi yer tuturdu. O, hər zaman qeyd edirdi ki, azərbaycanlı gənclər yaşadığı ölkələrin gələcəyidir və onların milli ruhda tərbiyəsi, keyfiyyətli təhsil alması dövlətin prioritet vəzifəsidir.
Hələ o dövrdə Azərbaycanın özündə mövcud olan iqtisadi çətinliklərə baxmayaraq, Ulu Öndərin müvafiq tapşırıqları əsasında burada yaşayan soydaşlarımızın sosial problemlərinin qismən aradan qaldırılması məqsədilə mühüm dəstək layihələri həyata keçirilib. Azərbaycanın iqtisadi qüdrətinin daha da möhkəmlənməsi nəticəsində, Müzəffər Ali Baş Komandan, Prezident İlham Əliyev tərəfindən Gürcüstanda yaşayan soydaşlarımızın problemləri daim diqqət mərkəzində saxlanılıb, son 20 il ərzində sosial və infrastruktur layihələrinin icrasına 80 milyon dollardan artıq maliyyə vəsaiti ayrılıb, nəticədə onlarla məktəb, idman mərkəzləri, yollar, uşaq bağçaları və digər mühüm infrastruktur obyektləri inşa edilib. Həyata keçirilən layihələr arasında ən mühüm və strateji əhəmiyyət daşıyan təşəbbüslərdən biri də 2013-cü ildən başlanılan və hazırda geniş vüsət alan tələbələrin illik təhsil haqlarının ödənilməsi proqramıdır.
Ulu Öndərin təşəbbüsü ilə həyata keçirilən transmilli enerji və nəqliyyat layihələri bu gün də regionun iqtisadi xəritəsini müəyyənləşdirir.
Səfir qeyd edib ki, Ümummilli Lider Azərbaycan ilə Gürcüstan arasında dostluq və strateji tərəfdaşlıq münasibətlərinin formalaşmasının əsas memarlarından biri olub. Ərsəyə gətirilən meqalayihələr yalnız iqtisadi layihələr deyil, eyni zamanda, Azərbaycan ilə Gürcüstan arasında qarşılıqlı etimadın təzahürü, xalqlarımızın rifahının və ölkələrimizin dayanıqlı inkişafının təminatı, o cümlədən regionun geosiyasi xəritəsini dəyişdirən birgə iradənin ifadəsidir.
Heydər Əliyevin qurduğu və Prezident İlham Əliyevin tərəqqi yolu ilə apardığı və tarixi zəfərlərə qovuşduğu müasir Azərbaycan dövləti bu gün nəinki bölgədə, o cümlədən qlobal arenada nüfuzlu dövlətə çevrilib. Bütün bunların təməlində Ulu Öndər Heydər Əliyevin uzaqgörənliyi, sarsılmaz iradəsi və misilsiz liderlik bacarıqları dayanır.
“Bizim siyasətimiz dünyada sülh və inkişafın təşviq edilməsinə yönəldilib. Bu gün Azərbaycan ilə Gürcüstan Cənubi Qafqazda və bütövlükdə bölgədə sülhün və stabilliyin qarantıdırlar. Bunun sayəsində bölgəmizin siması dəyişib, nüfuzumuz artıb, xalqlarımız üçün gözəl fürsətlər yaranıb”, -deyə səfir vurğulayıb.
Qeyd olunub ki, ötən illər dövründə Azərbaycanın taleyüklü günlərində biz dost Gürcüstan xalqının və dövlətinin rəğbətini, dəstəyini, həmrəyliyini hiss etmişik. Azərbaycan ilə Gürcüstan arasında dostluq, qardaşlıq əbədidir.
Marneulinin meri Daur İsmayılov çıxışında bildirib ki, görkəmli dövlət xadimi Heydər Əliyev müstəqil Azərbaycan dövlətinin inkişaf yolunu müəyyənləşdirib. Heydər Əliyev ölkələrimizi birləşdirən sarsılmaz dostluğun formalaşmasında böyük rol oynayıb. Gürcüstan ilə Azərbaycan arasında strateji tərəfdaşlığın möhkəmləndirilməsində onun xidmətləri əvəzsizdir. Bu tərəfdaşlıq mühüm iqtisadi, nəqliyyat və mədəni əməkdaşlığı əhatə edir. Münasibətlərimiz xalqlarımız arasındakı tarixi dostluğa, qarşılıqlı hörmətə və bərabərliyə, çoxmillətli və çoxmədəniyyətli regionumuz üçün mühüm olan dəyərlərə əsaslanır.
Digər çıxış edənlər Ulu Öndərlə bağlı xatirələrini bölüşüb, onun ideyalarının daim yaşayacağını söyləyiblər.
Bölmənin digər xəbərləri
