Səhiyyə naziri İmişlidə vətəndaşları qəbul etmişdir

11.02.2014 [17:15]
Çap et
A⁺ A^-

İmişli, 11 fevral (AZƏRTAC). Azərbaycan Respublikasının Prezidenti İlham Əliyevin tapşırıq və tövsiyələrinə əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həll olunması üçün müxtəlif tədbirlər görürlər.

AZƏRTAC xəbər verir ki, fevralın 11-də səhiyyə naziri Oqtay Şirəliyev İmişli Rayon Mərkəzi Xəstəxanasında Ağcabədi, Beyləqan, İmişli, Füzuli və Xocavənd rayonlarından olan 50-dək vətəndaşı qəbul etmişdir.

Qəbulda vətəndaşların sağlamlıq problemləri, müalicə xərcləri, işlə təminat və s. məsələlərlə bağlı müraciətləri dinlənilmişdir.

Vətəndaşların müraciətində qaldırılan məsələlər nazirliyin müvafiq qurumlarının əməkdaşlarının iştirakı ilə araşdırılmış, onların bəziləri yerindəcə həllini tapmışdır.

Nazirliyin səlahiyyətlərinə aid olmayan məsələlər aidiyyəti üzrə çatdırılmaq üçün qeydiyyata alınaraq nəzarətə götürülmüşdür.