ŞƏKİDƏ REGİONAL TİBBİ YARDIM MƏRKƏZİ YARADILACAQDIR

13.11.2006 [13:48]
Çap et
A⁺ A^-

AZƏRTAC-ın müxbiri xəbər verir ki, yaxın vaxtlarda Şəki rayonu da daxil olmaqla, respublikanın 12 bölgəsində Səhiyyə Nazirliyinin Təcili və Təxirəsalınmaz Tibbi Yardım Stansiyasının regional mərkəzləri yaradılacaqdır.

Şəki mərkəzi rayon xəstəxanasının baş həkimi Sehran Məmmədov bildirmişdir ki, Şəki regional mərkəzinin fəaliyyət dairəsinə Balakən, Zaqatala, Qax, Şəki və Oğuz rayonları daxildir. Mərkəz xidmət ərazisində baş vermiş yol-nəqliyyat və digər qəza hallarında zərərçəkənlərə təcili, təxirəsalınmaz və konsultativ tibbi yardım göstərəcək, habelə təbii fəlakət, terror aktları, fövqəladə hallar və epidemiyalar zamanı keçirilən tədbirlərdə iştirak edəcəkdir.

Müasir tələblərə cavab verən tibbi cihaz və avadanlığı olan xüsusi avtomobillə təchiz ediləcək mərkəzə yüksək ixtisaslı, peşəkar həkim və sanitarlar cəlb olunacaqdır.

Regional mərkəz üçün Şəki mərkəzi rayon xəstəxanasının binasında 6 otaqdan ibarət xüsusi yer ayrılmışdır.