Naxçıvan, 6 dekabr, Nail Əsgərov, AZƏRTAC

Azərbaycan Respublikasının Prezidentinin 2024-cü il 5 dekabr tarixli Fərmanına əsasən Naxçıvan Sənaye Parkı yaradılır. Bu Fərman Naxçıvan Muxtar Respublikasının ölkənin milli iqtisadiyyatına tam və dolğun inteqrasiyası istiqamətində mühüm bir addımdır. Hələ 13 sentyabr 2019-cu il tarixli Şərur Sənaye Məhəlləsinin yaradılması haqqında Fərmanın 7.1, 7.2 və 7.3-cü bəndlərində də müəyyən edilən “Naxçıvan Muxtar Respublikasında yaradılan Sənaye Məhəllələri” ifadəsindən də aydın olur ki, muxtar respublikada Şərur Sənaye Məhəlləsindən sonra yeni Sənaye məhəllələri və ya parklarının yaradılması da nəzərdə tutulub. Yəni dövlətin iqtisadi prioritetlərində Naxçıvanın uzunmüddətli sosial-iqtisadi inkişafı strateji məsələ kimi yer alır. Təbii olaraq, bütün bu proseslərin səmərəli şəkildə tənzimlənməsi Sənaye Park və məhəllələrinin makroiqtisadi inkişafdakı yerinin, rolunun və əhəmiyyətinin yüksəldilməsi ilə də özünü göstərmiş olacaq.

Bu sözləri AZƏRTAC-ın Naxçıvan bürosuna açıqlamasında Naxçıvan Dövlət Universitetinin Beynəlxalq ticarət və menecment kafedrasının müdiri, iqtisad üzrə fəlsəfə doktoru, dosent Cavadxan Qasımov deyib.

O qeyd edib ki, dövlət başçısının 2023-cü il 5 iyun tarixli Sərəncamı ilə qəbul edilən Naxçıvan Muxtar Respublikasının 2023-2027-ci illər üzrə sosial-iqtisadi inkişafına dair Dövlət Proqramında da muxtar respublikanın davamlı makroiqtisadi inkişafında sənayeləşmə siyasətinin əhəmiyyəti vurğulanıb və burada Sənaye Park və məhəllələrinin yaradılması məqsədəuyğun hesab olunub. Prezidentin Fərmanına əsasən yaradılacaq Naxçıvan Sənaye Parkının əhatə edəcəyi ərazi muxtar respublikanın, əsasən, əkinçilik bölgəsi olan Arazboyu düzənlik sahəsində yerləşir. Həmin sahə əkinçilik məhsullarının 90 faizini özündə cəmləşdirir. Bu da o deməkdir ki, Naxçıvan Sənaye Parkının fəaliyyəti üçün kifayət qədər xammal ehtiyatları mövcud olacaq. Bu isə, təbii olaraq, parkın sənaye əhəmiyyətinin yüksəldilməsində həlledici mərhələni təşkil edəcək. Beləliklə, Naxçıvan Sənaye Parkı muxtar respublikanın digər regionlarında da yeni, dayanıqlı kənd təsərrüfatı sahələrinin yaradılmasını və sənaye əhəmiyyətli məhsulların istehsalını stimullaşdıracaq.

"Beləliklə, Naxçıvan Sənaye Parkının yaradılması, bir tərəfdən kiçik və orta sahibkarlıq subyektlərinin inkişafında mühüm mərhələ olacaq, digər tərəfdən zəruri infrastruktur təchizatlarının yaradılmasına təkan verəcək. Bununla da muxtar respublikanın yeni reallıqlar müstəvisində etibarlı və dayanıqlı iqtisadi inkişafında yeni mərhələni təmin etmiş olacaq", – deyə Cavadxan Qasımov əlavə edib.