SƏNGƏÇAL YARIMSTANSİYASINDA QƏZALARIN QEYDƏ ALINMASI ÜÇÜN “AURA” CİHAZI QURAŞDIRILMIŞDIR
“Azərenerji” ASC-nin mətbuat xidmətindən AZƏRTAC-a bildirmişlər ki, 300 kilovoltluq “Səngəçal” elektrik stansiyasının istifadəyə verilməsi ilə əlaqədar 220 kilovoltluq eyniadlı yarımstansiyada yenidənqurma işləri görülmüşdür.
Stansiyanın səmərəliliyini artırmaq və yeni texnikanın tətbiqi üçün qəzaların qeydə alınması üçün nəzərdə tutulmuş “AURA” qurğusu quraşdırılmışdır.
Bundan əlavə, 110 kilovoltluq 9-cu və 10-cu “Səngəçal” elektrik xətlərinin müdafiə panelləri, “2-ci Ələt” elektrik xəttinin gərginlik transformatorları dəyişdirilmişdir.
Bakı yüksəkvoltlu elektrik şəbəkəsində görülən təmir işləri çərçivəsində “AURA” qurğusu müəssisənin balansında olan 220 kilovoltluq “Xırdalan” yarımstansiyasında da quraşdırılmışdır. 250 meqavatlıq 3 nömrəli avtotransformatorun yağının qəza vəziyyətində axıdılması üçün qurğunun da tikintisi başa çatdırılmışdır.
“Müşfiq” elektrik xəttində transformatorlar, “2-ci Hövsan” elektrik xəttində şin ayırıcılar dəyişdirilmişdir. Hazırda yanğından mühafizə sistemi üçün nasosxana tikilir, yardımçı stansiyanın ərazisində abadlıq işləri aparılır.
220 kilovoltluq “Müşfiq” yarımstansiyasında elektrik xətlərinin qəzasız və sabit işləməsi üçün müvafiq işlər görülür.
Bölmənin digər xəbərləri
