Sentyabr ayı ərzində gigiyenik normaları pozan 86 müəssisənin sahibkarı cərimələnmişdir
Bakı, 19 oktyabr (AZƏRTAC). Respublikanın sanitariya-epidemioloji xidmət orqanları tərəfindən bu ilin sentyabr ayı ərzində yeyinti məhsullarının istehsalı, satışı, saxlanması və daşınması zamanı gigiyenik normalara əməl etməyən 86 müəssisənin sahibkarı inzibati qaydada cərimə olunmuşdur.
Respublika Gigiyena və Epidemiologiya Mərkəzindən AZƏRTAC-a bildirmişlər ki, bundan əlavə, 19 obyektin istismarının müvəqqəti dayandırılması barədə qərar qəbul edilmiş, 23 nəfər işdən müvəqqəti kənarlaşdırılmışdır.
Laboratoriyada yoxlanılan yeyinti məhsulları nümunələrinin 9-da orqanoleptik və fiziki-kimyəvi, 10-da mikrobioloji göstəricilərinə görə normalardan kənaraçıxma müəyyən olunmuşdur.
Şadlıq evlərindən 2692 yaxma nümunəsi, 26 soyuq qəlyanaltı nümunəsi götürülmüş, 53 yaxma nümunəsində mikrobioloji çirklənmə aşkar edilmişdir.
Sentyabr ayı ərzində əhali arasında baş vermiş 116 qida zəhərlənməsi hadisəsindən 166 nəfər zərər çəkmişdir. Baş vermiş 2 botulizm hadisəsindən isə 3 nəfər zərər çəkmiş və 1 nəfər ölmüşdür.
Bölmənin digər xəbərləri
