Şərqşünas-alimin elmi irsinə həsr edilmiş dəyirmi masa keçirilib
Bakı, 15 may, AZƏRTAC
AMEA-nın Gəncə bölməsində görkəmli şərqşünas-alim, professor Qəzənfər Əliyevin anadan olmasının 95-ci ildönümünə həsr edilmiş dəyirmi masa keçirilib.
Tədbirdən əvvəl iştirakçılar alimin Gəncə şəhər Fəxri xiyabandakı məzarını ziyarət ediblər.
Bu barədə AZƏRTAC-a AMEA-nın Gəncə bölməsindən məlumat verilib.
Tədbirdə Gəncə bölməsinin sədri akademik Fuad Əliyev çıxış edərək professor Qəzənfər Əliyevin elmi fəaliyyətinin əsas istiqamətini Nizami Gəncəvi irsi və onun Şərq ədəbiyyatına təsirinin öyrənilməsi olduğunu bildirib, bu baxımdan alimin özünəməxsus elmi məktəb yaratdığını vurğulayıb.
Akademik Fuad Əliyev qeyd edib ki, alimin “Nizaminin mövzu və süjetləri Şərq xalqları ədəbiyyatında” adlı son kitabında XIII-XX əsrlərdə Nizami mövzularında müxtəlif dillərdə yazılmış 600-dən çox əsər və onların müəllifləri barədə məlumatlar toplanıb.
Sonra AMEA-nın Gəncə bölməsi Nizami Gəncəvi Mərkəzinin elmi işçi Türkan Verdiyeva “Qəzənfər Əliyevin həyatı və yaradıcılığı”, Gəncə bölməsinin elmi işlər üzrə sədr müavini dosent Əlimuxtar Muxtarov “Qəzənfər Əliyevin tədqiqatlarında Nizami Gəncəvi və Şərq mövzusu” mövzusunda məruzələrlə çıxış ediblər. Dəyirmi masada, həmçinin “Qəzənfər Əliyevin Nizami mövzu və süjetləri, Şərq xalqları ədəbiyyatında monoqrafiyası haqqında”, “Nizami yurdunun görkəmli alimi” və “Qəzənfər Əliyev - alim və insan” mövzularında çıxışlar dinlənilib.
Qeyd olunub ki, Qəzənfər Əliyev “Nizami Gəncəvinin “Xosrov və Şirin” və Əmir Xosrov Dəhləvinin “Şirin və Xosrov” poemalarının müqayisəli təhlili” mövzusunda namizədlik, “Farsdilli ədəbiyyatın təşəkkülü problem” mövzusunda doktorluq dissertasiyası müdafiə edib. Onun Şərq xalqları ədəbiyyatına həsr olunmuş 160-dan çox elmi məqaləsi Azərbaycanda və xaricdə müxtəlif dillərdə nəşr olunub. Alimin yaradıcılığında “Hindistanın farsdilli ədəbiyyatı” monoqrafiyası da xüsusi yer tutur.
Qəzənfər Əliyev Moğollar dövrünün görkəmli dövlət xadimi və sərkərdəsi Bayram xan Baharlının bədii irsini üzə çıxarıb tədqiq edib. Bu baxımdan “Türkmən şairi Bayram xan” kitabı alimin kəşfidir. O, “Türkmən ədəbiyyatı tarixi”nin müəlliflərindən biri olub və bütün bu xidmətləri müqabilində 1980-ci ildə Türkmənistanın Dövlət Mükafatına layiq görülüb.
Dəyirmi masada Gəncə Dövlət Universitetinin dosenti Afaq Yusifli də çıxış edərək, görkəmli alimlərimizin elmi irsinə həssas münasibətə görə AMEA-nın Gəncə bölməsinin kollektivinə təşəkkürünü bildirib.
Bölmənin digər xəbərləri
