ŞİMŞƏKVURMADAN NECƏ QORUNMALI?
AZƏRTAC-ın xüsusi müxbiri Moldovanın “İnfo-Prim Neo” portalına istinadla xəbər verir ki, iyulun 23-də Moldovanın şimal və cənub rayonlarında baş vermiş fırtına zamanı iki nəfər şimşəkvurmadan həlak olmuşdur.
Drokiya rayonunun Popeştiy de Sus kəndinin 38 yaşlı sakini yağışlı tufan zamanı çöldə işləyirmiş. Onun çöldə tapılmış meyitinin üzərində və paltarında şimşəkvurma nəticəsində əmələ gələn yanıqlar aşkar edilmişdir.
Həmin gün Şoldeneştin 61 yaşlı sakini yağışdan qorunmaq üçün ağacın altında gizlənmiş və burada şimşəyə tuş gəlmişdir.
Mütəxəssislər tufan və yağış zamanı daha etibarlı sığınacaq tapmağı, hündür yerlərdə, ağacların, elektrik dirəklərinin altında, gilli torpağın üstündə dayanmamağı məsləhət görürlər.
Şimşək çaxarkən torpağa yaxın olmaq, başı aşağı əymək, dabanları birləşdirmək, dirsəkləri dizlərə sıxmaq, ovuclarla qulaqları tutmaq məsləhət görülür. Yerə uzanmaq tövsiyə olunmur, çünki ayaqlarla baş arasında gərginlik yarana bilər, bu isə çox təhlükəlidir. Ətrafdakı adamlardan 5 metrdən artıq məsafədə dayanmaq lazımdır.
