SOCGOV 2026 - Sosial xidmətlərin gələcəyi Xankəndidə müzakirə olunacaq
Bakı, 23 sentyabr, AZƏRTAC
Müasir dövrdə sosial xidmətlərin inkişafı və rəqəmsal texnologiyaların bu sahəyə inteqrasiyası dövlət-vətəndaş münasibətlərinin yeni mərhələsini formalaşdırır. "SOCGOV" təşəbbüsü sosial sahədə innovativ idarəetməyə yönəlmiş qlobal platformadır.
AZƏRTAC xəbər verir ki, bu platformanın missiyası sosial sahədə göstərilən xidmətlərin keyfiyyətinin yüksəldilməsi, süni intellekt və rəqəmsal texnologiyaların tətbiqi ilə həmin xidmətlərin daha əlçatan, çevik və şəffaf olmasına nail olmaqdır. Azərbaycan üçün bu təşəbbüsün xüsusi əhəmiyyəti ondadır ki, ölkəmiz sosial xidmətlərin rəqəmsallaşdırılması istiqamətində artıq qabaqcıl təcrübələr formalaşdırıb və bu təcrübə beynəlxalq müstəviyə çıxarılır.
Ölkəmizin sürətli tərəqqisini və tarixi Zəfər qazanmasını təmin edən Prezident İlham Əliyevin siyasətinin mərkəzində vətəndaş rifahının təminatı prinsipi dayanır. Son 7 ildə 5 böyük sosial islahat paketi icra olunub və 4 milyon insanı əhatə edən, illik əlavə olaraq 8 milyard manat vəsaitin ayrıldığı bu islahatlar sosial ödənişlərdə ciddi artımlara imkan verib, əhalinin sosial müdafiəsinin gücləndirilməsi istiqamətində mühüm irəliləyişlərə nail olunub.
Eyni zamanda, sosial islahatların mühüm istiqamətlərindən biri də dövlət sosial xidmətlər sisteminin rəqəmsallaşdırılmasıdır. Əmək və Əhalinin Sosial Müdafiəsi Nazirliyinin 152 xidmətindən 90 faizi elektronlaşdırılıb, o cümlədən 55 proaktiv xidmət istifadəyə verilib. Bu gün nazirliyin e-sistemlərinin 80-dək qurumun informasiya bazaları ilə inteqrasiyası həyata keçirilir. Bu e-xidmətlər fəaliyyət sahələri üzrə xidmətlərin çevikliyinə və şəffaflığına, onların vətəndaşlar üçün daha əlçatan olmasına imkan verib. Həmçinin dövlət sosial xidmətləri sahəsində süni intellektin imkanlarının tətbiqi üçün də “yol xəritəsi” üzrə işlər aparılır və artıq bu istiqamətdə addımlar atılıb.
Sosial sahənin gələcəyini texnologiya ilə birləşdirən ən böyük platformalardan biri kimi formalaşan "SOCGOV", qısa müddətdə Azərbaycanın beynəlxalq səviyyədə tanıdığı bir brendə çevrilib. Adı ingilis dilində “Social Governance”, yəni “sosial idarəetmə” sözlərindən yaranan bu təşəbbüs DOST Agentliyinin ideyasıdır və əsas missiyası sosial xidmətlərin keyfiyyətini artırmaq üçün innovativ həlləri dünyanın müxtəlif ölkələrindən gələn ekspertlərlə bir masada müzakirə etməkdir.
İlk dəfə 2025-ci ilin oktyabrında Bakıda, Gülüstan sarayında keçirilən "SOCGOV" konfransı “Süni intellekt insan və transformasiya üçün” şüarı altında ondan çox ölkədən dövlət nümayəndələrini, beynəlxalq təşkilatları, alimləri və özəl sektor təmsilçilərini bir araya gətirdi. Elə orada bu tədbirin təkcə bir dəfəlik konfrans deyil, uzunmüddətli bir platformaya çevriləcəyi elan olundu. DOST Agentliyi "SOCGOV"u beşillik inkişaf strategiyası kimi təqdim etdi və hər il miqyasını daha da böyütməyi hədəfləyib.
Bu strategiyanın növbəti mərhələsi "SOCGOV 2026"dır. Forum bu il oktyabrın 23-də Xankəndi şəhərində keçiriləcək və budəfəki əsas mövzu “Ağıllı idarəetmə üçün rəqəmsal təhlil” olacaq. Məkanın Xankəndi olaraq seçilməsi təsadüfi deyil. Bu, həm Azərbaycanın işğaldan azad edilmiş ərazilərində qurulan yeni həyatın və “Ağıllı şəhər” konsepsiyasının beynəlxalq ictimaiyyətə təqdimatı, həm də sosial idarəetmənin gələcəyinin məhz inklüziv və dayanıqlı inkişaf üzərində qurulduğunu göstərən simvolik bir addımdır.
"SOCGOV 2026"nın gündəliyi olduqca zəngindir. Səhər saatlarında rəsmi açılışla başlayacaq forum gün ərzində yüksək səviyyəli panellər, TEDx formatında debatlar və tematik işçi qrupları ilə davam edəcək. Müzakirələrin mərkəzində rəqəmsal analitika, süni intellektin sosial xidmətlərə tətbiqi, etik idarəetmə və məlumatlara əsaslanan qərarvermə dayanır. Əsas sual isə budur: Texnologiyanı daha soyuq və məsafəli deyil, vətəndaş üçün daha əlçatan, çevik və şəffaf xidmətə necə çevirmək olar.
Forumun ən maraqlı hissələrindən biri isə axşam keçiriləcək mükafatlandırma mərasimi olacaq. "SOCGOV 2026" çərçivəsində ilk dəfə təşkil edilən "AI4DOST Social Award" beynəlxalq müsabiqəsi bu il sosial sahədə innovasiyaları ön plana çıxarır. Müsabiqəyə sosial sahədə süni intellekt həlləri hazırlayan startaplar, sosial könüllülük və vətəndaş təşəbbüsləri ilə seçilən layihələr, bu sahəyə elmi töhfə verən tədqiqatlar və regional səviyyədə fərq yaradan sosial təşəbbüslər qatıla bilər. Bununla yanaşı, ilin gənc sosial innovatoru, sosial transformasiyanın lideri və sosial sahəyə davamlı töhfə verən şəxslər üçün fərdi mükafatlar da təqdim olunacaq. Qaliblər forumun səhnəsində elan ediləcək.
"SOCGOV 2026"nı fərqləndirən cəhət onun artıq regional tədbir sərhədlərini aşmasıdır. Forum Beynəlxalq Sosial Təminat Assosiasiyası kimi nüfuzlu qurumların rəsmi təqvimində yer alıb və dünyanın müxtəlif ölkələrindən iştirakçıları cəlb edir. Bu, bir vaxtlar Azərbaycanda formalaşan DOST modelinin artıq qlobal sosial idarəetmə müzakirələrində nümunə kimi göstərilməsi deməkdir.
Bir sözlə, "SOCGOV 2026" sadəcə texnologiyadan danışan bir konfrans deyil. Bu, dövlətin vətəndaşa xidmət anlayışının süni intellekt və verilənlər bazası ilə necə yenidən qurula biləcəyini, Xankəndi kimi yeni inkişaf mərkəzindən bütün dünyaya göstərən bir platformadır.
Bölmənin digər xəbərləri
