Son sutkada İranda COVID-19-dan 544 nəfər ölüb
Tehran, 21 avqust, AZƏRTAC
Avqustun 22-də İranda koronavirusa qarşı mübarizə qərargahının qərarı ilə elan olunan birhəftəlik karantin rejimi başa çatır.
AZƏRTAC xəbər verir ki, qərargah vəziyyəti təhlil edib karantin rejiminin müddətini uzada bilər. Məsələnin mahiyyəti ondan ibarətdir ki, gündəlik ölüm 500-dən aşağı enmir. Karantin rejimi başa çatır. Lakin yoluxma və ölüm hallarında azalma müşahidə edilmir.
Səhiyyə Nazirliyinin açıqlamasına görə, son 24 saat ərzində ölkədə 24 min 179 yoluxma, 544 ölüm halı qeydə alınıb. Bununla da İranda yoluxanların ümumi sayı 4 milyon 640 min 695 nəfərə, ölənlərin ümumi sayı isə 101 min 354-ə çatıb.
Xüsusi xəstəxanalarda müalicə alan 7 min 626 nəfərin vəziyyəti ağır olaraq qalır. Eyni zamanda, 3 milyon 902 min 808 nəfər sağalaraq evə buraxılıb.
Məhərrəm ayı ilə əlaqədar olaraq, məscidlərdə insanların bir yerə toplanması müşahidə edilir. Mütəxəssislər hesab edir ki, sentyabrın ilk həftəsi yoluxma sayında artım olacaq.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
