Son təxribatlar Laçın-Xankəndi yolunda sərhəd-buraxılış məntəqəsinin qurulmasını zəruri etmişdi - Ekspert
Bakı, 23 aprel, AZƏRTAC
Müdafiə Nazirliyinin son məlumatlarına görə, Azərbaycan Ordusunun bölmələrinin Laçın yolunun şimalındakı torpaq yolları nəzarətə götürməsindən sonra Ermənistandan Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasına və bu məqsədlə yeni keçid yollarının müəyyən edilməsinə cəhdlər göstərilir. Xatırlatmaq istərdim ki, nazirlik bir ay əvvəl Laçın yolu və Xankəndi-Xəlfəli-Turşsu yolu istiqamətində ermənilərin hərbi təyinatlı daşımaları həyata keçirməsini dəfələrlə bəyan etmişdi. Bu barədə Rusiya sülhməramlı qüvvələri rəhbərliyinə istər Xarici İşlər Nazirliyimiz, istər Müdafiə Nazirliyimizin yazılı bəyanatı olub. Bundan sonra biz gedən proseslərə baxsaq görərik ki, Azərbaycan Ordusu Turşsu-Xəlfəli istiqamətində Azərbaycanın daha iki kəndini vizual müşahidə etməyə nail olub. Bu kəndlər də Azərbaycan Ordusunun nəzarətinə keçib. Yəni, Müdafiə Nazirliyinin təxribatlarla bağlı hər hansı bəyanat verməsinin əməli nəticəsini biz ötən ilin avqustunda “Qisas” cavab əməliyyatı zamanı şahidi olmuşuq.
Bu barədə AZƏRTAC-a müsahibəsində Qarabağ müharibəsi veteranı, ehtiyatda olan polkovnik-leytenant, hərbi-siyasi ekspert Elmar Hüseyn Ermənistandan Qarabağa hərbi yükləri daşıması ilə bağlı son təxribatlara münasibət bildirərkən söyləyib.
Hərbi ekspertin sözlərinə görə, digər tərəfdən Ermənistandakı vəziyyətə görə müxalifətlə xaricdəki ermənilərin diasporu və erməni kilsəsi arasında razılaşmaya əsasən Paşinyan hakimiyyəti devrilə bilər. Ermənistanda bəzi revanşist qüvvələr Paşinyan hakimiyyətini devirdikdən sonra Seyran Ohanyan, Robert Koçeryan kimi hərbi cinayətkarların hakimiyyətə gəlməsini və yeni müharibə ocaqlarının yaranmasını başlatmaq istəyir. Lakin Xankəndində onlara yaratdığımız şəraitdən müsbət nəticə çıxarmayan ermənilər üçün bu yaxşı nəticələrə gətirib çıxarmayacaq.
Qarabağ müharibəsi veteranı Prezident İlham Əliyevin Tərtər rayonunun Talış kəndində Azərbaycan xalqına müraciətini xatırladaraq deyib: “Əfsuslar olsun ki, bu gün İkinci Qarabağ müharibəsinin ibrət dərsi Ermənistana hələ ki, dərs olmayıb. Çünki biz görürük ki, Ermənistanda revanşist qüvvələr baş qaldırıb. Ermənistanda yenə də Azərbaycana qarşı, Azərbaycan torpaqlarına qarşı ərazi iddiaları qaldırılır. Biz Ermənistan rəhbərliyini bu çirkin əməllərdən çəkindirmək üçün xəbərdar edirik. Ermənistanın arxasında dayanan bəzi ölkələri də bax, buradan - azad edilmiş Talış kəndindən xəbərdar edirik ki, əl çəkin bu çirkin əməllərdən. Azərbaycan dövlətinin, xalqının iradəsinə heç bir kənar qüvvə təsir edə bilməz”.
Ehtiyatda olan polkovnik-leytenant bildirib ki, aprelin 21-i səhər saatlarında Ermənistan ordusunun təminat vasitələrini daşıyan hərbi avtomobil texnikasının Laçın dəhlizi istiqamətində, cığır, keçid və yaxınlaşma yollarından istifadə etməklə Rusiya sülhməramlı qüvvələrinin müşayiəti ilə qeyri-qanuni erməni silahlı dəstələrinin döyüş mövqelərinə yeni silah daşınmaları və hərbi təxribat xarakterli fəaliyyəti texniki vasitələrlə müşahidə olunub. Xankəndi-Gorus və yaxud Xankəndi və Ermənistan sərhədinin istiqamətlərində yolların sayı olduqca çoxdur. Bu yolların sayı havanın yaz-yay fəsillərində və payızın əvvəlində quru olur. Bu torpaq yollardan, hətta gələcəkdə hərbi yük daşımaları heyvanlar vasitəsilə həyata keçirilə bilər. Azərbaycanın Qarabağ iqtisadi rayonuna Ermənistan tərəfindən hərbi daşınma cəhdləri üçtərəfli Bəyanatın müddəalarının kobud şəkildə pozulması ilə yanaşı, bölgədə gərginliyin artmasına və ermənilərin yeni təxribatlarına zəmin yaradır. Ona görə də Ermənistanın son təxribatları göstərir ki, Laçın yolunun son nöqtəsində Azərbaycanla Ermənistan arasında mütləq sərhəd-keçid və nəzarət məntəqəsinin yaradılması zəruridir. Hər hansı erməni fəaliyyətinə imkan verilməməsi üçün burada Azərbaycanın apardığı antiterror əməliyyatı mütəmadi olaraq yenilənməlidir.
Elmar Hüseyn qeyd edib ki, torpaqlarımızın işğaldan azad edilməsi hərbi qüdrətimizin göstəricisidir. Hər hansı təxribata Azərbaycan dövləti və ordusu tərəfindən ən ağır şəkildə cavab veriləcək. Dövlətimizi başçısı Ermənistanda revanşist qüvvələr baş qaldırdığı üçün istənilən vəziyyətə hazır olmalıyıq: “Düzdür, biz İkinci Qarabağ müharibəsində düşmənin başını əzərək möhtəşəm Qələbə əldə etmişik. Ancaq Ermənistanda revanşist qüvvələr yenə baş qaldırır, biz istənilən vəziyyətə hazır olmalıyıq və elə bir ordu yaratmalıyıq ki, dünya miqyasında nümunəvi olsun və ən güclü ordulardan biri olsun. Bu gün də Azərbaycan Ordusu güclüdür. Biz gücümüzü döyüş meydanında göstərmişik. Biz döyüş meydanında həm Azərbaycan xalqının gücünü, iradəsini, əyilməz ruhunu göstərdik, eyni zamanda, hərbçilərimizin peşəkarlığını göstərdik, öz hərbi potensialımızı göstərdik”.
Bütün bu təxribatlar göstərirdi ki, Azərbaycanın Qarabağ iqtisadi rayonuna Ermənistandan hərbi yüklərin daşınması dərhal dayandırılmalı, qeyri-qanuni erməni silahlı dəstələrinin ən qısa müddətdə ərazimizdən çıxarılması təmin olunmalıdır. Bu, Azərbaycan ilə sərhəddə Laçın-Xankəndi yolunun girişində sərhəd nəzarət-buraxılış məntəqəsinin qurulmasını zəruri etmişdi.
Bölmənin digər xəbərləri
