Şotlandiyanın Birinci naziri iqlim fəalları ilə görüşüb
Qlazqo, 2 noyabr, AZƏRTAC
Şotlandiyanın Qlazqo şəhərində keçirilən COP26 İqlim Dəyişikliyi Konfransı çərçivəsində Şotlandiyanın Birinci naziri Nikola Stercen iqlim fəalları Qreta Tunberq və Vanessa Nakate ilə mavi zonada görüşüb.
AZƏRTAC xəbər verir ki, görüş zamanı Stercen söyləyib ki, Tunberq kimi ekoaktivistlərin səsi çox vacibdir.
Qlzaqoda ekoaktivistlərin keçirdiyi etiraz aksiyalarına qatılan 18 yaşlı Qreta Tunberq Şotlandiya hökumətinin iqlim siyasətini tənqid edərək, ölkədə iqlim dəyişikliyi ilə mübarizə aparan liderin olmadığını söyləyib. Şotlandiya 2030-cu ilə qədər tullantıları 75 faiz azaltmağı və 2045-ci ilə qədər istilik effekti yaradan qazların emissiyalarının səviyyəsini sıfıra endirmək öhdəliyi götürsə də, son üç ilin öhdəliklərini yerinə yetirməyib.
O, həmçinin şəxsi tviter səhifəsindən noyabr ayının 5-də Qlazqoda ekoaktivistlər tərəfindən təşkil olunacaq böyük yürüşdə iştirak edəcəyini də elan edib.
Sözügedən yürüş Qlazqonun qərbində yerləşən Kelvinqrov Parkında başlayacaq və şəhərin mərkəzindəki Corc Meydanında yekunlaşacaq.
Aynurə Tağıyeva
AZƏRTAC-ın xüsusi müxbiri
Qlazqo
Bölmənin digər xəbərləri
