Soyqırımı qurbanlarının xatirəsi əbədi yaşayacaq
Bakı, 31 mart, AZƏRTAC
Martın 31-də Səbail Rayon Mərkəzləşdirilmiş Kitabxana Sisteminin 1 nömrəli filialında (M.Ə.Sabir adına Mərkəzi Şəhər Kitabxanasında) azərbaycanlıların soyqırımına həsr edilən tədbir keçirilib.
AZƏRTAC xəbər verir ki, kitabxananın direktoru Gülşən Abbasova tədbir iştirakçılarına faciə haqqında məlumat verib. O, azərbaycanlılara qarşı soyqırımını insanlıq əleyhinə cinayət adlandırıb, tariximizin ən qanlı səhifəsi olduğunu bildirib.
Səbail rayon MKS-nin direktoru Nüşabə Ələkbərova qeyd edib ki, Azərbaycan ordusu gündən-günə möhkəmlənir. Aprel döyüşləri isə ordumuzun qüdrətini növbəti dəfə nümayiş etdirib. N.Ələkbərova, həmçinin torpaqlarımızın tezliklə geri alınmasına ümidvar olduğunu bildirib.
Hüseynqulu Sarabski adına mədəniyyət evinin direktoru Tərlan Akçay, Nəsimi rayon MKS-nin 3 nömrəli filialının direktoru Dilşad Məmmədova və rəssam Elnurə İsgəndərova qeyd ediblər ki, soyqırımı qurbanlarının xatirəsi əbədi yaşayacaq. Onlar çıxışlarında vurğulayıblar ki, xalqımız zəbt edilmiş torpaqlarımızı geri almaq uğrunda nəyin bahasına olursa-olsun mübarizə aparmalıdır. Bu gün uzaqda deyil.
Sonra tədbir iştirakçıları istedadlı azərbaycanlı rəssamların 31 mart faciəsinə həsr edilən əsərlərindən ibarət ekspozisiya ilə tanış olublar.
Tədbir müzakirələrlə davam edib.
Bölmənin digər xəbərləri
