Suçiçəyi səpgiləri müxtəlif ölçüdə olur və bədəndə qaşınma yaradır
Bakı, 24 fevral, AZƏRTAC
Yazın gəlişi hava-damcı yolu ilə yayılan xəstəliklərin aktivləşməsinə səbəb olur. İlin həmin mövsümündə, xüsusilə də 5-14 yaşlı uşaqlar arasında xəstəlik daha çox yayılmağa başlayır. Mövsümü olmasının səbəbi bu virusun günəşin ultrabənövşəyi şüalarına qarşı davamsız olmasıdır.
AZƏRTAC xəbər verir ki, Azərbaycan Tibb Universitetinin dosenti, pediatr Nigar Sədiyeva deyib: “İnfeksiya xüsusilə 1 aya qədər uşaqlar, immun çatışmazlığı olanlar, hamilə qadınlar, xroniki xəstəliyi olanlar üçün təhlükəlidir. Uşaqlar arasında səpgilərlə müşayiət olunur. Suçiçəyi səpgilərinin içi maye ilə möhtəviyyatı dolur. Ağızın selikli qişasında, saçlı dəridə bütün bədənə yayılmış çəhrayı elementlərlə xarakterizə olunur”.
İnfeksiya özünü qarın ağrısı, 39 dərəcəyədək qızdırma, narahatlıq, iştahasızlıq və halsızlıqla büruzə verir. Səpgilər ilk olaraq bədəndə üzə çıxır, daha sonra baş və üzə yayılır. Nadir hallarda qollarda və ayaqlarda görünür. Səpgilər müxtəlif ölçüdə olur və bədəndə qaşınma yaradır. Pediatrın sözlərinə görə, suçiçəyi yoluxan xəstələrin çimməməsi barədə deyilənlər tamamilə yanlışdır.
Həkim-pediatr bildirib: “Suçiçəyi zamanı xüsusilə dəriyə diqqətli qulluq göstərilməsi və uşaqların çimdirilməsi lazımdır. Digər bir yanlışlıq xəstəlik zamanı valideynlərin “zelyonka” adı ilə tanınan brilyant yaşılından çox istifadə etməsidir. Yeni səpgilər çıxdıqca ana brilyant yaşılından çox istifadə etməyə başlayır. Qeyd edək ki, onun sürtülməsi səpgilərin qarşısını almır və onların sağalmasını sürətləndirmir. Dəriyə düzgün qulluq, ehtiyac olduqda həkim nəzarəti altında qaşınmanın qarşısını alan antihistamin preparatların istifadəsi və yanaşı əlamətlər, qızdırma və s. müşahidə olunanda həmin əlamətlərə yönəlmiş müalicə aparılması tövsiyə olunur”.
Xəstəlik hamilə qadınlarda ciftdən dölə də keçə bilir. Xəstə ilə təmasdan 14-22 gün sonra ilkin əlamətlər özünü büruzə verir. İnkubasiya dövrü 11-21 gün arası davam edir. Suçiçəyinə ikinci dəfə yoluxma halına nadir də olsa rast gəlmək mümkündür. Həmin virusa yoluxmaqdan qoruyan ən etibarlı yol isə peyvənd olunmaqdır.
Bölmənin digər xəbərləri
