Sudanda bazara mərmi düşməsi nəticəsində azı 20 nəfər həlak olub
Bakı, 6 noyabr, AZƏRTAC
Sudanın paytaxtı Xartumda Omdurman bazarına mərmi düşməsi nəticəsində 20-dən çox insan ölüb.
AZƏRTAC xarici mətbuata istinadla xəbər verir ki, bu barədə ölkədəki qeyri-hökumət təşkilatı olan Demokratiya Tərəfdarı Hüquqşünaslar Komitəsi məlumat yayıb.
Bildirilib ki, bu hadisə ordu rəisi Əbdülfəttah əl-Burhan və onun Çevik Dəstək Qüvvələrinə (RSF) komandanlıq edən keçmiş müavini Məhəmməd Həmdan Daqlo qüvvələri arasında aprel ayından bəri baş verən döyüşlərdə sonuncu qan tökülməsidir.
Açıqlamada iki tərəf arasında intensiv atışma zamanı mərmilərin Omdurman bazarına düşdüyü bildirilib. Omdurman dəfələrlə iki tərəf arasında şiddətli döyüşlərin meydanı olub.
Döyüşlərin böyük hissəsi əvvəllər Darfurun qərb bölgəsində aparılsa da, şahidlərin sözlərinə görə, paytaxt Xartumun cənubundakı ərazilərə də yayılıb.
Yerli qurumların hesablamalarına əsasən, indiyədək Sudan münaqişəsində 10 mindən çox insan həlak olub.
Birləşmiş Millətlər Təşkilatının məlumatına görə, müharibə təxminən 5,5 milyon insanın həm Sudan daxilində, həm də sərhədləri aşaraq qaçmasına səbəb olub.
Bölmənin digər xəbərləri
