SUDANDA TƏYYARƏ QƏZASI
İyulun 8-də Sudanda baş vermiş təyyarə qəzası nəticəsində, ilkin məlumata görə, 104 adam və heyətin 11 üzvü həlak olmuşdur. Ölkənin paytaxtı Xartumdan alınan xəbərdə deyilir ki, “Sudan eyrueyz” aviasiya şirkətinə məxsus “Boinq-737” təyyarəsi Port-Sudan şəhərinin aeroportundan havaya qalxdıqdan bir neçə dəqiqə sonra pilot maşında texniki nasazlıq olduğunu bildirmiş və təcili yerə enməyə icazə verilməsini xahiş etmişdir. Bundan az sonra təyyarə ilə rabitə əlaqəsi kəsilmişdir. Belə bir məlumat da var ki, Xartuma uçan bu təyyarənin qəzaya uğramasına səbəb hava şəraitinin əlverişsiz olması idi. Qəza Port-Sudan şəhərindən 5,5 kilometr kənarda, boş sahə üzərində baş vermişdir. Yerli radionun məlumatına görə, təyyarədəki sərnişinlərdən yalnız bir nəfər - ikiyaşlı uşaq sağ qalmışdır. Həkimlər demişlər ki, onun həyatı təhlükədən kənardadır.
