Sudanın müxalifət qüvvələri idarəçi Suveren Şuraya üzv olacaq beş namizədinin adını açıqlayıb
Əddis-Əbəbə, 18 avqust, AZƏRTAC
Sudanın əsas müxalifət birliyi olan “Azadlıq və dəyişikliklər” alyansı yeni formalaşan idarəçi Suveren Şuraya öz beş namizədinin adlarını açıqlayıb.
AZƏRTAC yerli KİV-ə istinadla xəbər verir ki, müxalifət qüvvələri alimlər Ayşə Musa və Siddik Tauer, jurnalist Məhəmməd əl-Faki, hüquqşünas Taxa Osman və Sudanın ən qocaman “Al-Umma” müxalifət partiyasının keçmiş liderlərindən biri Hasan Şeyx İdrisin namizədliklərini irəli sürüb.
Xatırladaq ki, avqustun 17-də Sudanın paytaxtı Xartumda ölkənin Hərbi Şurası və əsas müxalifət birliyi olan “Azadlıq və dəyişikliklər” alyansı arasında Konstitusiya Bəyannaməsi və siyasi sazişin yekun variantı imzalanıb. İdarəçi Suveren Şuranın yaradılması imzalanmış Konstitusiya deklarasiyasının əsas müddəalarından biridir. Şuraya 11 nəfər - 5 nəfər Hərbi Şuradan, 5 nəfər “Azadlıq və dəyişikliklər” müxalifat alyansından və 1 nəfər hər iki tərəfin razılığı əsasında daxil olacaq.
Asya Hacızadə
AZƏRTAC-ın xüsusi müxbiri
Əddis-Əbəbə
Bölmənin digər xəbərləri
