Sudhakar Dass: “Nine Senses” layihəsinin təşviq etdiyi iş yüksək qiymətə layiqdir
Bakı, 3 may, Günel Alıyeva, AZƏRTAC
“Nine Senses Fest” Beynəlxalq Yoqa Festivalı çərçivəsində “Karma: taleyini təyin et” adlı mühazirə ilə çıxış edən layihənin baş rəhbərlərindən biri olan Sudhakar Dass AZƏRTAC-ın müxbiri ilə söhbətində qeyd edib ki, Bakıda şəffaf mühit hökm sürür, yerli sakinlər şəxsi inkişafa və özünü təkmilləşdirməyə çalışırlar.
O deyib: “Bir daha Bakıya gəlmək və öz əməli müdrikliyimi onun sakinləri ilə bölüşmək mənim üçün çox xoşdur. Hesab edirəm ki, bu festival gözəl təşəbbüsdür”.
Sudhakar Dassa görə, “Nine Senses” layihəsinin təşviq etdiyi öz üzərində işləmək və daxili vəziyyətinizi yaxşılaşdırmaq ideyası yüksək tərifə layiqdir.
“Bu prosesin bir hissəsi olduğum üçün şadam və öz biliklərimi paytaxt sakinləri və qonaqlar ilə bölüşmək imkanım var”, - deyə o əlavə edib.
Sudhakar Dass 20 ildən artıqdır ki, insan şüurunun inkişafını öyrənir. “Vedanta Academy India” nümayəndəsi kimi, o, BMT, “Deloitte” və Sinqapur Bankı da daxil olmaqla aparıcı şirkətlər, universitetlər və təşkilatlarda çıxış edir.
Xatırladaq ki, Beynəlxalq Yoqa Festivalı Heydər Əliyev Fondunun vitse-prezidenti, “Nine Senses” İncəsənət Mərkəzinin təsisçisi və Azərbaycan Yoqa Federasiyasının prezidenti Leyla Əliyevanın dəstəyi ilə keçirilir.
Bölmənin digər xəbərləri
