SUMQAYIT VETERANLARI ŞƏHƏRİN İCTİMAİ- SİYASİ HƏYATINDA FƏAL İŞTİRAK EDİRLƏR
Şuranın sədri Surxay Məmmədovun hesabat məruzəsində qeyd olunmuşdur ki, təşkilatın sıralarında birləşən 2 mindən çox müharibə və əmək veteranı Sumqayıtın ictimai-siyasi həyatında fəal iştirak edir. Veteranların gördüyü işlərdən, şəhərdə sağlam mənəvi-psixoloji ab-havanın yaradılmasına göstərdikləri köməkdən danışılmış, gənclərdə vətənpərvərlik ruhunun yüksəldilməsində veteranların iştirakı xüsusi vurğulanmışdır. Onlar məktəblərdə, əmək kollektivlərində, yaşayış massivlərində müntəzəm surətdə gənclərlə görüşərək, şəhərdə aparılan quruculuq işlərindən söhbət açırlar. Veteranların fikrincə, bu cür tədbirlər sakinlərdə əməyə və doğma şəhərə məhəbbət hissi aşılayır.
Nümayəndələrin çıxışlarında veteranların istirahəti üçün əlverişli şərait yaradan və bayram günləri onları yaddan çıxarmayan şəhər rəhbərliyinin ünvanına xoş sözlər, şuranın işinin təkmilləşdirilməsinə dair təklif və tövsiyələr səslənmişdir.
