Sumqayıtda 56 saylı körpələr evi-uşaq bağçası əsaslı şəkildə təmir olunub
Sumqayıt, 1 iyun, Ətrabə Rzayeva, AZƏRTAC
Sumqayıt şəhərinin 10-cu mikrorayonunda yerləşən 56 saylı körpələr evi-uşaq bağçası əsaslı şəkildə təmir olunub. Burada uşaqların rahatlığı, istirahəti və ilkin biliklərə yiyələnmələri, onların istirahətinin yüksək səviyyədə təşkili üçün hər cür şərait yaradılıb. Həyətyanı sahə abadlaşdırılıb, oyun meydançaları yaradılıb, söhbətgahlar düzəldilib. Bütün bu işlər 1 iyun - Uşaqların Beynəlxalq Müdafiəsi Günü ərəfəsinə təsadüf edib.
Şəhər icra hakimiyyətinin başçısı Zakir Fərəcov əsaslı təmirdən sonra uşaq bağçasında yaradılan şəraitlə tanış olub. Bildirilib ki, otaqlardakı ekoloji cəhətdən təmiz materiallardan hazırlanan yataq dəstləri, oyuncaqlar və dərs ləvazimatları bütün sanitar-gigiyenik norma və standartlara cavab verir. Bağçanın divarlarını uşaqların sevimli nağıl qəhrəmanlarının şəkilləri bəzəyir.
“Təhsil sahəsində qazanılan uğurlar məktəbəqədər təhsildən başlayır. Məktəbəqədər təhsil uşaqların intellektual, fiziki və psixoloji inkişafında, potensial imkanlarının üzə çıxarılmasında mühüm rol oynayır. Həmçinin uşaqların məktəbə hazırlanmasına, onlarda mədəni keyfiyyətlərin, müstəqillik, yaradıcılıq, təşəbbüskarlıq və həyati bacarıqların formalaşmasına ciddi təsir edir”. Bu sözləri AZƏRTAC-ın müxbiri ilə söhbət zamanı 56 saylı körpələr evi-uşaq bağçasının müdiri Zöhrə İsmiyeva deyib.
1976-cı ildən fəaliyyət göstərən və bu günə qədər əsaslı təmir edilməyən təlim-tərbiyə müəssisəsi artıq tam təmirli və yüksək səviyyədə təchiz edilmiş halda uşaqların ixtiyarına verilib. 180 körpə bu müəssisədə daha gözəl, daha işıqlı, daha təmirli şəraitdə təlim-tərbiyə alacaq. Z.İsmiyeva bağçanın 8 qrupdan ibarət olduğunu, burada bütün mebel, avadanlıqlar, ləvazimatların yeniləndiyini qeyd edib. Valideynlər də uşaqlar qədər çox sevinir. Axı övladları müasir bağçalarda təlim-tərbiyə alacaqlar. Övladlarını bu uşaq bağçasına gətirən valideynlər onlardan arxayındırlar. Bilirlər ki, burada uşaqlara ən azı evdəki kimi qayğı göstəriləcək. Vaxtında yatacaq, oynayacaq, gigiyenik qaydalara əməl edilməklə hər gün müxtəlif çeşidli dadlı yemək yeyəcək və təhlükəsizlikləri tam qorunacaq.
Valideynlər Umxanım Abdullayeva, Günay Şükürova və digərləri fidanlara müəllimlər və dayələr tərəfindən böyük qayğı göstərildiyini bildiriblər. Uşaqların erkən inkişaf vərdişlərinə yiyələnməsində, bilik bacarıqların aşılanmasında, musiqi və rəqsə olan bacarıqlarının ortaya çıxmasında onların çox əməyi var.
Bir sözlə, körpələr evi-uşaq bağçasında balacaların təlim-tərbiyəsi ilə məşğul olmaq, həmçinin onlarda bacarıq və istedadları aşkarlamaq üçün hərtərəfli şərait yaradılıb. Bütün bunlar dövlətimizin gələcəyimiz olan uşaqlara göstərdiyi qayğının təzahürüdür.
Bölmənin digər xəbərləri
