SUMQAYITDA ELEKTRİK ENERJİSİ İSTEHLAKININ ARTACAĞI GÖZLƏNİLİR
“Azərenerji” Səhmdar Cəmiyyətinin mətbuat xidmətindən AZƏRTAC-ın müxbirinə bildirmişlər ki, şəhərin getdikcə inkişaf etməsi, iri sənaye obyektlərinin bərpası elektrik enerjisi istehlakının daim artmasına səbəb olur. İndi Sumqayıtın sənaye müəssisələri 130-150 meqavat enerji sərf edirlər. Təkcə alüminium zavodu son vaxtlar istehlakı 10 meqavatdan 60 meqavata çatdırmış, tezliklə isə bu göstəricini 110-130 meqavata qaldırmağı planlaşdırır. Bundan əlavə, boruyayma zavodu və kimya müəssisələri də tam gücləri ilə işləməyə başlayırlar.
Mütəxəssislər yaxın illərdə Sumqayıtda elektrik enerjisi istehlakının xeyli artacağını proqnozlaşdırırlar. Bununla bağlı, şəhərdə iri elektrik stansiyasının inşası ön plana çəkilir. “Şimal” DRES-ə oxşar qurğunun inşası müsbət amildir. Tərtib edilmiş təlim cədvəlinə müvafiq olaraq, enerji blokunun tikintisi zamanı stansiyanın işçiləri “Şimal” DRES-də və 1 nömrəli Bakı İstilik Elektrik Mərkəzində tikilmiş və dünya standartlarına cavab verən bloklarda ixtisaslarını artıracaqlar.
Bölmənin digər xəbərləri
