SUMQAYITDA NARKOMANİYANIN PROFİLAKTİKASI GÜCLƏNDİRİLİR
AZƏRTAC-ın müxbiri Sumqayıtdan xəbər verir ki, şəhərin yaşayış massivlərində, eləcə də yaxınlıqdakı Corat və Hacı Zeynalabdin Tağıyev qəsəbələrində sakinlərlə sistematik görüşlər keçirilir. Bu görüşlərdən məqsəd gənclər arasında narkomaniyanın yayılması məsələləri ilə bağlı əhalinin məlumatlılıq səviyyəsinin artırılması və bu sosial bəlaya qarşı mübarizənin gücləndirilməsidir.
Şəhərin demək olar ki, bütün məhəllə və mikrorayonlarında təşkil edilən görüşlər, disputlar zəmanəmizin aktual problemlərindən birinə - narkomaniyaya həsr edilmişdir. Sumqayıt İcra Hakimiyyətinin himayəsi altında keçirilən tədbirlərdə polis idarəsinin, gənclər və idman idarəsinin, təhsil şöbəsinin, narkoloji dispanserin rəhbərləri, həkimlər, psixoloqlar, sosioloqlar və başqa mütəxəssislər iştirak edirlər. Onlar öz çıxışlarında hamını narahat edən problem - gənclər arasında narkomaniyanın yayılması və onun ağır nəticələri haqqında söhbət açırlar. Sağlam həyat tərzinin zəruriliyi xüsusi vurğulanır.
Çıxışlarda haqlı olaraq qeyd edildiyi kimi, xalqımızın zəngin mədəniyyəti ilə tanışlıq, eləcə də idman məşğələləri tamdəyərli şəxsiyyətin formalaşmasına kömək edir, həm gənclərə, həm də cəmiyyətə fayda verir.
Görüşlərin sonunda şəhər icra hakimiyyəti tərəfindən xüsusi olaraq bu məqsədlə alınmış kinofilmlər nümayiş etdirilir.
