ŞUŞA RAYONU QUŞÇULAR KƏND ORTA MƏKTƏBİNİN MÜƏLLİMİ RƏFAEL TEYMURLUNUN ÇIXIŞI
-Möhtərəm cənab Prezident!
İcazə verin, Sizin xeyir-duanızla ərsəyə gəlmiş bu gözəl yeni qəsəbədə Sizi salamlayım. Xoş gəlmisiniz, qədəmləriniz mübarək olsun!
Sizin məhz bu unudulmaz gündə bizi yad etməyiniz ümid və inamımızı xeyli dərəcədə artırır, gündən-günə qüdrətlənən, çiçəklənən ölkəmizin nələrə qadir olduğunu bir daha sübut edir.
Möhtərəm cənab Prezident, bu gün mənim yadıma 13 il əvvəl 1994-cü ildə ulu öndər Heydər Əliyevlə olan görüşümüz düşür. Biz onda “Zuğulba” sanatoriyasında yaşayırdıq. İndi burada iştirak edən adamların bir çoxu yəqin ki, o günləri yaxşı xatırlayır. Ölkənin ən ağır günləri idi. Bir yandan daxildə baş qaldıran qeyri-sağlam qüvvələr, digər tərəfdən xaricdən bizi istəməyən qüvvələrin təzyiqi - bütün bu çətinliklərin, ağırlıqların öhdəsindən yalnız Heydər Əliyev kimi dahi gələ bilərdi və bildi də. Ulu öndər dünyanın ən iri neft şirkətlərini Bakıya dəvət etməklə bu gün xalqımızın, hamımızın faydasını gördüyü Bakı-Tbilisi-Ceyhan neft kəmərinin əsası qoyuldu.
Möhtərəm cənab Prezident, bu görüşdə iştirak edənlərin çoxu təsdiqləyə bilər ki, biz öz kəndimizi - Malıbəylini tərk edib buraya gələndə su içməyə stəkanımız da yox idi. İndi şükürlər olsun ki, camaatımızın maddi rifahı xeyli dərəcədə yüksəlibdir. Bütün bunların hamısı Sizin sayənizdə baş vermişdir. Sözün doğrusu, bu qısa zaman kəsiyində belə gözəl, abad bir şəhər tipli qəsəbənin bizim ixtiyarımıza veriləcəyinə heç inanmağımız gəlmirdi. Ancaq bu, reallıqdır. Bu qəsəbə artıq bizim ixtiyarımıza verilibdir. Cənab Prezident, bu, məhz Sizin məcburi köçkünlərə, qaçqınlara, ümumiyyətlə, bütün Azərbaycan vətəndaşlarına göstərdiyiniz qayğının ən böyük təzahürüdür.
Cənab Prezident, Azərbaycan dünyada kiçik bir ölkədir. Müstəqilliyimizin də yaşı o qədər çox deyildir. Açığını desək, Azərbaycanın bugünkü inkişafı bizim düşmənlərimizin kədərinə səbəb olur, dostlarımızı isə sevindirir. Bu gün Azərbaycan böyük bir tikinti meydançasını xatırladır. Haraya baxırsan abadlıq-tikinti işləri gedir. Körpülərin tikilməsi, asfalt yolların çəkilməsi, yeni yaşayış massivlərinin salınması, olimpiya komplekslərinin bir-birinin ardınca istifadəyə verilməsi - bütün bunların hamısı bizi son dərəcə sevindirir.
Mən məktəb müəllimi olduğumdan kiçik bir haşiyə çıxmaq istəyirəm. Adi bir müəlliməm. Aldığım əmək haqqının ilbəil artması ailə büdcəmizin kifayət qədər yüksəlməsinə səbəb olur. Biz inanırıq ki, maaşlarımız, əmək haqlarımız bundan sonra da hər il artacaq və maddi vəziyyətimiz daha da yaxşılaşacaqdır.
Müəllim olduğum üçün məktəb tikintisindən danışmaya bilmərəm. Heydər Əliyev Fondunun rəhbəri Mehriban xanım Əliyevanın məktəb tikintisinə bu qədər canıyananlıqla və ciddi yanaşması biz müəllimləri çox sevindirir. Möhtərəm Prezident, biz inanırıq ki, “Təhsil millətin gələcəyidir” fikri bu gün özünü tam mənası ilə doğruldur. Sizin “Azərbaycanın bütün vətəndaşları neft gəlirlərindən faydalanmalıdır” fikriniz bu gün tam mənası ilə öz təsdiqini tapır. Hər bir ailə bu gözəl yaşayış üçün Sizə dərin minnətdarlığını bildirir.
Möhtərəm cənab Prezident, ataların gözəl bir məsəli var: “Görünən kəndə bələdçi lazım deyil”. Sizin gördüyünüz bu əzəmətli və nəhəng işlərin hamısı xalqın gözünün qabağındadır. Bu işləri görməyən göz kor, eşitməyən qulaq kar, duymayan ürək daşdır.
Ancaq cənab Prezident, bizim üçün salınan bu qəsəbə nə qədər gözəl, rahat olsa da, belə hesab edirəm ki, yenə də doğma torpaqlarımızı əvəz edə bilməz. İnanırıq ki, o torpaqlarımız da gec-tez geri alınacaqdır. Burada iştirak edən hər birimiz o torpaqların alınması üçün müsəlləh əsgər libası geyinib döyüşməyə tam hazırıq.
Möhtərəm cənab Prezident, çıxışımın sonunda Sizə bir daha dərin minnətdarlığımı və təşəkkürümü bildirirəm. Sizin Qarabağda, Şuşada, Malıbəylidə və bizim daha neçə qaçqın-köçkün yurdlarımızda belə görüşlər keçirməyinizi arzulayıram. Arzu edirəm ki, biz belə görüşləri o torpaqlarda keçirək. Sağ olun, Allah amanında.
X X X
Azərbaycan Prezidenti İlham Əliyev mərasimdə nitq söylədi.
Bölmənin digər xəbərləri
