“Taliban” hərəkatı hökumət məmurları üçün amnistiya elan edib
Bakı, 17 avqust, AZƏRTAC
Əfqanıstanda hakimiyyəti ələ alan “Taliban” hərəkatı ümumi amnistiya elan edib.
AZƏRTAC France-Presse agentliyinə istinadla xəbər verir ki, amnistiya, həmçinin hökumət məmurlarına da şamil olunacaq. “Siz tam əminliklə gündəlik həyatınıza qayıda bilərsiniz”, - deyə hərəkatın nümayəndəsi bildirib.
Amerika və müttəfiq qoşunlarının Əfqanıstanı tərk etməsindən sonra hücum əməliyyatlarını genişləndirən “Taliban” hərəkatı avqustun ortalarında bütün iri şəhərlərə və sərhəd-buraxılış məntəqələrinə nəzarəti ələ keçirib. Avqustun 15-də taliblər paytaxt Kabilə daxil olub və prezident sarayını nəzarətə götürüb. Prezident Əşrəf Qani ölkəni tərk edib və onun harada olduğu dəqiq bilinmir.
“Taliban” hərəkatının siyasi ofisinin rəsmi nümayəndəsi Məhəmməd Naim bildirib ki, Əfqanıstanda müharibə başa çatıb, dövləti idarəetmə forması isə yaxın zamanlarda bəlli olacaq. Taliblər keçid hökuməti qurulmasına razı deyil.
Bölmənin digər xəbərləri
