Tareq Ubru: Azərbaycandakı yüksək tolerantlıq ənənələri digər ölkələr üçün örnək ola bilər
Bakı, 19 aprel (AZƏRTAC). Avropa Azərbaycan Cəmiyyətinin (AAC) təşkilatçılığı ilə Fransanın müxtəlif dini icmalarının və ictimai təşkilatlarının təmsilçilərindən ibarət nümayəndə heyəti Azərbaycanda səfərdə olmuşdur.
AAC-dan AZƏRTAC-a verilən məlumata görə, Fransanın “Fəxri Legion” ordeni mükafatçısı, Bordo Müsəlman Məscidinin rəhbəri və Fransanın cənub-qərb bölgəsinin müftisi Tareq Ubrunun rəhbərlik etdiyi nümayəndə heyətinə Fransa İslam Yardımı Təşkilatının baş katibi və Bordo ofisinin rəhbəri xanım Xədicə Ubru, Jirond Müsəlman Federasiyasının baş katibi Müslim Şərafəddin, Fransa yəhudi icmasının Akvatin Şurasının və bu ölkədəki Fransadakı yəhudilərin mərkəzi məhkəməsinin Bordo regional nümayəndəsi Didye Quec, “Hexagone Partners” təşkilatının direktoru Qay Antuan Kasteks və Terror Qurbanları Assosiasiyasının vitse-prezidenti Pyer Koneza daxil idi.
Səfərin məqsədi “Azərbaycan dini tolerantlığın modeli kimi” mövzusunda yerli dini qurumlar, dövlət və ictimai təşkilatlarda görüşlər keçirmək, Fransa-Azərbaycan əlaqələrinin inkişafı istiqamətində əməkdaşlığın perspektivlərini müzakirə etmək olmuşdur. Bu tədbirin davamı olaraq car il iyunun 15-də Fransanın Bordo şəhərində və Fransa Senatında eyni adlı mövzu üzrə konfransların keçirilməsi də planlaşdırılmışdır.
Azərbaycanda fransalı qonaqlar Fəxri xiyabanda ümummilli lider Heydər Əliyevin məzarını və Şəhidlər xiyabanını ziyarət etmişlər.
Fransa nümayəndə heyəti Qafqaz Müsəlmanları İdarəsində (QMİ), Azərbaycanın Xarici İşlər Nazirliyində, Dini Qurumlarla İş üzrə Dövlət Komitəsində və digər yerlərdə olmuş, Avropa və gürcü yəhudiləri dini icmalarının rəhbərləri ilə görüşmüşdür.
Nümayəndə heyəti, həmçinin QMİ tərəfindən keçirilən “MDB müsəlmanları sülh və sabit inkişaf tərəfdarıdırlar” adlı beynəlxalq konfransda iştirak etmişdir.
T.Ubru səfərin yekunlarına dair açıqlama verərək bildirmişdir ki, görüşlər olduqca maraqlı, məhsuldar və qarşılıqlı etimad şəraitində keçmişdir. Mən və həmkarlarım bir daha əmin olduq ki, Azərbaycan İslam dünyasının tarixi-mədəni mərkəzlərindən biri olmaqla, dünyəvi və çoxkonfessiyalı dövlətdir. Azərbaycanda dini konfessiyalar arasında qarşılıqlı hörmət və etimada əsaslanan mehriban dostluq və əməkdaşlıq münasibətləri mövcuddur. Azərbaycanda yüksək tolerantlıq ənənələri formalaşmışdır. Bu model digər ölkələr üçün örnək ola bilər. Fikrimcə, bu sahədə Azərbaycanın zəngin təcrübəsinin öyrənilməsi olduqca vacibdir. Azərbaycanın səsinin Avropaya çatdırılmasında, Fransa ilə münasibətlərin daha da genişləndirilməsi istiqamətində əlimizdən gələni etməyə hazırıq.
Bölmənin digər xəbərləri
