Göydəniz Qəhrəmanov: Bakı–Tbilisi qatar xəttinin yenidən açılması regional turizmə yeni imkanlar yaradır
Bakı, 23 may, AZƏRTAC
Azərbaycan Prezidenti İlham Əliyev tərəfindən həyata keçirilən uğurlu regional əməkdaşlıq siyasəti nəticəsində Bakı–Tbilisi qatar xəttinin yenidən fəaliyyətə başlaması və Azərbaycan vətəndaşlarının Gürcüstana giriş-çıxışı ilə bağlı imkanlarının genişlənməsi turizm sektoru üçün mühüm addım hesab olunur. Bu qərar həm iki ölkə arasında turist axınının artmasına, həm də regionda iqtisadi və mədəni əlaqələrin daha da güclənməsinə xidmət edəcək.
Bu fikirləri AZƏRTAC-a açıqlamasında Azərbaycan Turizm Agentlikləri Assosiasiyasının İdarə Heyətinin sədri, Milli Məclisin deputatı Göydəniz Qəhrəmanov deyib.
Onun sözlərinə görə, uzun illərdir Azərbaycan və Gürcüstan arasında formalaşmış turizm əlaqələri hər iki ölkənin iqtisadiyyatına mühüm töhfə verib. Gürcüstan azərbaycanlı turistlərin ən çox səfər etdiyi istiqamətlərdən biri olduğu kimi, Azərbaycan da Gürcüstan vətəndaşları üçün maraqlı turizm mərkəzlərindən hesab olunur. Dəmir yolu əlaqəsinin yenidən açılması daha sərfəli, rahat və təhlükəsiz səyahət imkanları yaradaraq turist axınının artmasına səbəb olacaq.
“Xüsusilə Bakı–Tbilisi qatar marşrutu həm klassik səyahət ənənələrini yaşadan, həm də regionun turizm potensialını birləşdirən xüsusi nəqliyyat xəttidir. Qatar səyahəti turistlər üçün yalnız bir nəqliyyat vasitəsi deyil, həm də marşrut boyunca bölgələrin təbiətini, mədəniyyətini və ölkələrin həyat tərzini müşahidə etmək imkanı yaradan fərqli turizm təcrübəsidir. Bu baxımdan sözügedən xəttin fəaliyyətə başlaması regional turizm paketlərinin hazırlanmasına da yeni imkanlar açır.
Eyni zamanda bu addım Azərbaycanın regionun əsas turizm və nəqliyyat mərkəzlərindən biri kimi mövqeyini daha da gücləndirir. Bakı ilə Tbilisi arasında yenidən canlanan dəmir yolu əlaqəsi Cənubi Qafqazda turizmin inkişafına yeni dinamika qazandıracaq”, - deyə Milli Məclisin deputatı fikirlərini tamamlayıb.
Bölmənin digər xəbərləri
