MDU-nun rektoru: Malayziya ali təhsil ocaqları ilə əməkdaşlıq universitetimizin qlobal inkişaf xəttini gücləndirəcək
Mingəçevir, 23 may, AZƏRTAC
Qloballaşan müasir dünyada ali təhsil müəssisələrinin missiyası və cəmiyyətdəki rolu sürətlə dəyişməkdədir. Artıq universitetlər yalnız ənənəvi bilik ötürücüsü və kadr hazırlığı mərkəzi olmaqla kifayətlənmir, onlar eyni zamanda cəmiyyətin dayanıqlı inkişafını təmin edən, ekoloji cəhətdən məsuliyyətli, resurslardan səmərəli istifadəni dəstəkləyən və innovativ ekosistemləri formalaşdıran aparıcı mərkəzlərə çevrilirlər.
Bu fikirləri AZƏRTAC-ın bölgə müxbirinə Mingəçevir Dövlət Universitetinin rektoru Anar Eminov bildirib.
Rektor vurğulayıb ki, təhsilin keyfiyyətinin qorunması, tədqiqatyönümlü mühitin formalaşdırılması və sağlam, təhlükəsiz gələcəyin inşa edilməsi bu gün ali təhsilin ən ali fəlsəfəsidir.
“Mingəçevir Dövlət Universiteti olaraq, inkişaf strategiyamızın təməlində məhz bu dayanıqlılıq və yenilikçilik prinsipləri dayanır. Tədris mühitimizin rəqabətqabiliyyətliliyinin artırılması, yaşıl düşüncəyə, ekoloji tarazlığa və inklüziv inkişafa xidmət edən mütərəqqi idarəetmə modellərinin tətbiqi bizim üçün mütləq prioritetdir. Hədəfimiz sadəcə təhsil vermək deyil, qlobal çağırışlara adekvat cavab verə bilən, sosial məsuliyyəti dərk edən və cəmiyyətə fayda verən vətəndaşlar yetişdirməkdir. Bu prinsipləri real iş müstəvisinə keçirməyin ən səmərəli yollarından biri isə qabaqcıl beynəlxalq təcrübənin dərindən öyrənilməsi və qlobal akademik şəbəkələrə fəal inteqrasiyadır”, - deyə Anar Eminov əlavə edib ki, bu baxımdan Cənub-Şərqi Asiya, xüsusilə də Malayziyanın zəngin və sürətlə inkişaf edən ali təhsil məkanı böyük cəlbediciliyə malikdir.
Bu gün Malayziya universitetləri özlərinin yüksək texnoloji təchizatı, rəqəmsal öyrənmə mühitləri, startap ekosistemləri və innovativ tədqiqat imkanları ilə qlobal miqyasda xüsusi seçilirlər. Daha da önəmlisi, onların təhsil idarəçiliyi təbiətə və cəmiyyətə zərər vurmadan böyüməyi, enerjiyə qənaəti, "ağıllı" və dayanıqlı kampus idarəetməsini, eləcə də rəqəmsal transformasiyanı əsas götürür. Malayziyanın təhsil imkanlarından faydalanmaq, bu mütərəqqi təcrübələrin, müasir laboratoriya modellərinin və texnoloji yanaşmaların MDU-nun gələcək inkişaf xəttinə inteqrasiyası innovasiya potensialının gücləndirilməsinə və insan kapitalının keyfiyyətinin kəskin şəkildə artırılmasına misilsiz töhfə verəcəkdir. Məhz bu uzunmüddətli inkişaf vizyonunun və fəal xarici siyasətimizin məntiqi nəticəsi olaraq, 2026-cı ilin mayın 19-dan 22-dək Mingəçevir Dövlət Universiteti ilə Malayziyanın üç qabaqcıl ali təhsil müəssisəsi – INTI Beynəlxalq Universiteti, Asia Sakit Okean Texnologiya və İnnovasiya Universiteti və BINUS Universiteti arasında Əməkdaşlıq haqqında Memorandumlar imzalanıb. Bu sazişlər sadəcə kağız üzərindəki hüquqi razılaşmalar deyil, MDU-nun gələcəyə hesablanmış strateji və dayanıqlı tərəfdaşlıq fəlsəfəsinin təzahürüdür. INTI Beynəlxalq Universiteti ilə qurulan əlaqələr bizə tələbəyönümlü ali təhsil modellərini, müasir rəqəmsal öyrənmə platformalarını və beynəlxalq akademik mühitin ən uğurlu təcrübələrini tətbiq etməyə imkan yaradacaq. Asiya-Sakit Okean Texnologiya və İnnovasiya Universiteti ilə olan tərəfdaşlığımız isə birbaşa texnologiya transferinə, universitetimiz daxilində innovasiya və startap ekosisteminin yaradılmasına qapı açacaq. BINUS Universiteti ilə bağlanan saziş isə müasir ali təhsil idarəetməsində rəqəmsal transformasiya və institusional inkişaf sahəsində mütərəqqi yanaşmaların mənimsənilməsində mühüm rol oynayacaq. Hər üç tərəfdaşlıq fəlsəfəsi etibarilə eyni bir ali məqsədə, yəni MDU-da tədris və elmi-tədqiqat mühitinin ətraf mühitlə, təbiətlə ahəngdar şəkildə, dayanıqlılıq prinsiplərinə uyğun inkişafına xidmət edir. Ortaq fəaliyyətlər təkcə bilik və təcrübə mübadiləsi ilə məhdudlaşmayacaq. Planlaşdırılan birgə elmi-tədqiqat layihələri, tələbə və müəllimlərin akademik mobillik proqramlarında fəal iştirakı, resurslardan birgə səmərəli istifadə və innovativ həllərin tətbiqi regionun ali təhsil məkanında tamamilə yeni bir ab-hava formalaşdıracaq. Davamlılıq və inkişaf təkcə bugünkü resursların səmərəli idarə edilməsi deyil, həm də gələcək nəsillər üçün sağlam və möhkəm intellektual təməllərin atılmasıdır. “MDU-nun Malayziya ali təhsil müəssisələri ilə yaratdığı bu qlobal məzmunlu təhsil körpüləri ali təhsil müəssisəsinin müasir qlobal təhsil məkanına daha dərindən və inamla inteqrasiya olunmasını təmin edəcək. İnanıram ki, əldə etdiyimiz bu razılaşmalar çox qısa zamanda real layihələrdə, birgə tədqiqatlarda və yüksəkixtisaslı gənc kadrların yetişdirilməsində öz bəhrəsini verəcək, ölkəmizin tərəqqisinə yeni töhfələr qazandıracaq”, - deyə MDU-nun rektoru bildirib.
Vüsalə Cənnətova – müxbir
Bölmənin digər xəbərləri
