QHT sədri: “Bakı Fəaliyyətə Çağırış” Azərbaycanın qlobal urbanizasiya rolunu təsdiqlədi
Bakı, 26 may, AZƏRTAC
Bakıda keçirilən Ümumdünya Şəhərsalma Forumunun 13-cü Sessiyası (WUF13) dünyanın şəhərsalma, dayanıqlı inkişaf və urbanizasiya sahəsində ən nüfuzlu beynəlxalq platformalarından biri kimi tarixə düşdü. Azərbaycanda keçirilən bu tədbir təkcə yüksək təşkilatçılığı ilə deyil, həm də qlobal çağırışlara dair mühüm siyasi və humanitar mesajları ilə beynəlxalq diqqət mərkəzində oldu. Bakı bu tədbirlə bir daha göstərdi ki, müasir şəhərlər haqqında qlobal müzakirələr artıq yalnız inkişaf etmiş paytaxtlarda deyil, həm də yeni geosiyasi və humanitar baxış formalaşdıran məkanlarda aparılır.
Bu sözləri AZƏRTAC-a açıqlamasında siyasi şərhçi, "İslahatçı Gənclər" İctimai Birliyinin sədri Fərid Şahbazlı deyib.
Onun sözlərinə görə, WUF13 Azərbaycanın beynəlxalq dialoq platforması kimi artan nüfuzunu nümayiş etdirməklə yanaşı, Bakını gələcəyin urbanizm xəritəsində strateji mərkəzlərdən birinə çevirdi. Tədbirin yekun sənədi kimi qəbul edilən “Bakı Fəaliyyətə Çağırış” isə Azərbaycanın beynəlxalq urbanizasiya və postmünaqişə bərpası gündəliyində artan rolunun mühüm təsdiqi kimi qiymətləndirilə bilər. Sənəddə yer alan müddəalar göstərir ki, Bakı artıq təkcə regional deyil, beynəlxalq şəhərsalma və dayanıqlı inkişaf müzakirələrinin əsas platformalarından birinə çevrilir. 176 ölkədən 58 mindən artıq iştirakçının qatıldığı forumun tarixdə ən böyük Ümumdünya Şəhərsalma Forumu kimi xarakterizə olunması Azərbaycanın təşkilati imkanlarına, təhlükəsiz və açıq beynəlxalq dialoq mühiti yaratmaq bacarığına verilən yüksək qiymət kimi diqqət çəkir. Azərbaycan dövlətinə və xalqına ifadə olunan minnətdarlıq isə ölkənin beynəlxalq tədbirlərə ev sahibliyində formalaşdırdığı etimad mühitinin göstəricisidir.
“WUF13 çərçivəsində təqdim edilən Bakı Şəhər Mükafatı ayrıca qeyd olunmaqla Azərbaycanın urbanizasiya və şəhər idarəçiliyi sahəsində beynəlxalq təşəbbüslər irəli sürən ölkə kimi mövqeyini daha da gücləndirdi. Bu təşəbbüs gələcəkdə innovativ və inklüziv şəhər inkişafı modellərinin təşviqi baxımından mühüm platformaya çevrilə bilər”, - deyə QHT sədri bildirib.
Bölmənin digər xəbərləri
