WUF13 Azərbaycanın şəhərsalma mədəniyyətini və beynəlxalq nüfuzunu dünyaya təqdim etdi ŞƏRH
Bakı, 26 may, AZƏRTAC
Ümumdünya Şəhərsalma Forumunun Bakıda keçirilən 13-cü Sessiyası (WUF13) tarixdə əlamətdar hadisə kimi yadda qaldı.
Bu fikirləri Milli Məclisin deputatı Hikmət Babaoğlu AZƏRTAC-a açıqlamasında bildirib.
Onun sözlərinə görə, ilk dəfə idi bu tədbirə 176 ölkədən 58 mindən çox iştirakçı qatılırdı. WUF13-də urbanizasiya, məskunlaşma, şəhərsalma, şəhərlərdə inklüziv həyat, ekoloji problemlər və digər aktual məsələlər Bakıda müzakirə edildi, müxtəlif təşəbbüslər və həll yolları irəli sürüldü. WUF13-ün ən yaddaqalan məqamlarından biri Azərbaycanın özünü və şəhərsalma mədəniyyətini dünyaya yenidən təqdim etməsi oldu. Azərbaycan iki kontekstdə – həm tarixi şəhərsalma ənənələrini, həm də müasir şəhər yaratma fəaliyyətini beynəlxalq ictimaiyyətin diqqətinə çatdırdı. Forum çərçivəsində Azərbaycanın qədim dövrlərdən etibarən şəhərsalma mədəniyyətinin mühüm mərkəzlərindən biri olduğu nümayiş etdirildi. Azərbaycan Prezidenti İlham Əliyevin çıxışının daxili strukturuna diqqət etsək, görərik ki, dövlət başçısı Qəbələ şəhərini antik dövrdən ilk orta əsrlərə qədər mövcud olmuş Albaniya dövlətinin paytaxtı kimi təqdim etdi.
H.Babaoğlu qeyd edib ki, daha sonra İslam mədəniyyəti dövründə Şamaxının şəhərsalma ənənələri, Atabəylər dövründə Naxçıvan şəhərinin memarlıq irsi və Əcəmi Naxçıvaninin fəaliyyəti xüsusi vurğulandı. Ən sonda isə Prezident işğaldan azad edilmiş ərazilərdə formalaşdırılan yeni şəhərsalma modeli və onun standartları barədə dünya ictimaiyyətini məlumatlandırdı. Bu yanaşma Azərbaycanın şəhərsalma təcrübəsinin və mədəniyyətinin dünya ictimaiyyətinə kompleks şəkildə təqdim olunması baxımından mühüm əhəmiyyət daşıyır. Bu, həm Azərbaycanın təcrübəsinin öyrənilməsi, həm də şəhərsalma mədəniyyətimizin keyfiyyət göstəricisi kimi beynəlxalq ictimaiyyətə təqdim olunması idi. Qlobal medianın və beynəlxalq ictimaiyyətin diqqətinin Bakıya yönəldiyi bir vaxtda Azərbaycanın bu şəkildə təqdim olunması ölkəmizin tanınması və beynəlxalq münasibətlər sistemində mövqelərinin güclənməsi baxımından mühüm rol oynadı. Azərbaycan erməni işğalı nəticəsində dağıdılmış şəhərlərin yenidən qurulması məsələsinə də tədbir çərçivəsində xüsusi diqqət çəkdi. Bu, müasir mərhələdə Azərbaycan şəhərsalma təcrübəsinin dünyaya təqdim olunması idi.
“WUF13 çərçivəsində “Bakı Fəaliyyətə Çağırış” sənədinin qəbul olunması da xüsusi əhəmiyyət daşıyır. Bu sənəd XXI əsrin urbanizasiya və məskunlaşma problemlərinin demək olar ki, bütün istiqamətlərini özündə əks etdirən kompleks sənəddir. Sənəddə şəhər məskunlaşması, hüquqi əsaslar, şəhərsalma mühitinin sənədləşdirilməsi, şəhər ekologiyası, şəhər sənayesinin inkişaf istiqamətləri, inklüziv şəhər mühiti və müxtəlif yaş qrupları üçün əlçatan yaşayış kimi məsələlər yer alıb. Bu məsələlərin “Bakı Fəaliyyətə Çağırış” sənədində əks olunması gələcək WUF tədbirlərində müzakirə ediləcək problemlərin kompleks şəkildə təqdim olunması baxımından mühüm əhəmiyyət daşıyır”, – deyə H.Babaoğlu bildirib.
Deputat hesab edir ki, WUF13 Azərbaycanın özünü dünyaya yenidən təqdim etməsi və beynəlxalq nüfuzunun daha da artması üçün yeni imkanlar yaratdı. 176 ölkədən 58 mindən çox iştirakçının Bakıya gəlməsi, sadəcə, statistika deyil. Bu, Azərbaycanın beynəlxalq münasibətlər sistemindəki nüfuzunun göstəricisidir. Bu fakt Azərbaycan Prezidentinin beynəlxalq aləmdəki nüfuzu, dövlətimizin gücü və həyata keçirilən uğurlu siyasətlə birbaşa bağlıdır.
Bölmənin digər xəbərləri
