“Sea Breeze”də çoxfunksiyalı idman infrastrukturunun inkişafı planlaşdırılır
Bakı, 26 may, AZƏRTAC
"Sea Breeze" kurort kompleksi futbol arenası, buz meydançası və padel akademiyası da daxil olmaqla bir sıra idman layihələrinin həyata keçirilməsini planlaşdırır.
AZƏRTAC xəbər verir ki, bunu “Sea Breeze” layihəsinin təsisçisi Emin Ağalarov “Dream Fest” ərəfəsində keçirilən brifinqdə açıqlayıb.
Onun sözlərinə görə, beynəlxalq padel və tennis turnirlərinin keçirilməsinə imkan verəcək iki dünyasəviyyəli kortlu qapalı padel-tennis akademiyasının tikintisi artıq təsdiqlənib.
Futbol arenası layihəsi üzərində işlər də davam edir. Onun ilkin tutumu 5000 tamaşaçı olacaq və obyekt 10.000-15.000 oturacağa qədər genişləndirilə bilər. Stadion beynəlxalq standartlara cavab verəcək və böyük idman tədbirlərinə ev sahibliyi edə biləcək.
Planlara buz meydançasının tikintisi də daxildir. “Sea Breeze” bu layihədə məşhur rusiyalı fiqurlu konkisürən və məşqçi Yevgeni Plyuşenko ilə əməkdaşlıq etmək niyyətindədir.
E. Ağalarov bildirib ki, kiçik qapalı konkisürmə meydançası artıq tikilib və “Luna Park” layihəsi çərçivəsində iki həftə ərzində onun açılışı planlaşdırılır.
O, həmçinin qeyd edib ki, kompleksdə müntəzəm olaraq marafonlar, velosiped yarışları, voleybol, MMA, tennis və padel turnirləri daxil olmaqla müxtəlif idman tədbirləri təşkil olunur. Bu yay yeni turnirlərin keçiriləcəyi gözlənilir.
“Biz bütün idman növlərini dəstəkləyirik və onları inkişaf etdirmək istəyirik. “Sea Breeze” əyləncə, idman, təhsil mühiti və rahat mənzilləri özündə birləşdirən həyat tərzidir”, - deyə sahibkar vurğulayıb.
Bölmənin digər xəbərləri
