Müstəqillik Günü xalqımızın azadlıq iradəsinin simvoludur ŞƏRH
Bakı, 26 may, AZƏRTAC
Mayın 28-i tarixi Azərbaycan dövlətçiliyinin bərpası, milli azadlıq ideallarının gerçəkləşməsi və xalqın müstəqil yaşamaq iradəsinin təntənəsi kimi böyük əhəmiyyət daşıyır. Belə ki, 1918-ci il mayın 28-də Şərqdə ilk demokratik parlamentli respublika olan Azərbaycan Xalq Cümhuriyyətinin yaradılması elan edilib. Bununla da Azərbaycan xalqı əsrlər boyu davam edən dövlətçilik ənənələrini yenidən dirçəldib, müstəqil və demokratik dövlət qurmaq iradəsini bütün dünyaya nümayiş etdirib.
Bu sözləri AZƏRTAC-a açıqlamasında Milli Məclisin deputatı Pərvanə Vəliyeva deyib.
O qeyd edib ki, XX əsrin əvvəllərində dünyada və regionda baş verən siyasi proseslər Azərbaycan xalqının milli azadlıq hərəkatını gücləndirib. “Azərbaycan Xalq Cümhuriyyəti cəmi 23 ay fəaliyyət göstərməsinə baxmayaraq, dövlət quruculuğu sahəsində mühüm nailiyyətlər əldə edib. Respublika demokratik idarəçilik prinsiplərinə əsaslanıb. İlk dəfə olaraq qadınlara seçki hüququ verilməsi, parlamentin yaradılması, dövlət atributlarının qəbul edilməsi və milli ordunun formalaşdırılması həmin dövr üçün böyük tarixi hadisələrdir. Həmin vaxt Dövlət dili Azərbaycan dili elan edilib, milli təhsil sistemi yaradılıb, mədəniyyət və elm sahəsində mühüm addımlar atılıb. Həmçinin 1919-cu ildə Bakı Dövlət Universitetinin yaradılması da Cümhuriyyətin ən böyük nailiyyətlərindən biri hesab olunur”, - deyə deputat vurğulayıb.
Pərvanə Vəliyeva 1991-ci il oktyabrın 18-də qəbul edilən “Azərbaycan Respublikasının Dövlət Müstəqilliyi haqqında Konstitusiya Aktı”nı vurğulayıb, Azərbaycanın öz dövlət müstəqilliyini bərpa etdiyini xatırladıb: “Müasir Azərbaycan Respublikası özünü Azərbaycan Xalq Cümhuriyyətinin siyasi və mənəvi varisi elan edib. Ümummilli Lider Heydər Əliyev tərəfindən müstəqilliyin qorunması və möhkəmləndirilməsi Azərbaycan tarixində xüsusi yer tutur. Ulu Öndərin hakimiyyətə qayıdışından sonra ölkədə siyasi sabitlik təmin edilib, dövlətçilik ənənələri möhkəmləndirilib və Azərbaycanın beynəlxalq nüfuzu artıb. Məhz onun rəhbərliyi ilə milli dövlətçilik ideologiyası formalaşıb, Azərbaycan dünya birliyində layiqli yer tutub. Ölkəmiz Ulu Öndər Heydər Əliyevin uğurlu siyasəti sayəsində dünyada tanınan nüfuzlu bir dövlətə çevrilib. Yalnız Ulu Öndərin hakimiyyətə qayıdışından sonra Azərbaycan özünün geosiyasi imkanlarını gerçəkləşdirməyə başlayıb. Ulu Öndər Heydər Əliyevin respublikada uğurla gerçəkləşdirdiyi siyasət xalqımızın tarixi-mədəni yaddaşını özünə qaytararaq milli mənlik şüurunu inkişaf etdirib, azərbaycançılıq məfkurəsi işığında müstəqillik arzularının güclənməsi və yaxın gələcəkdə yenidən həqiqətə çevrilməsinə zəmin yaradıb. Bu strategiya bu gün Ulu Öndərin siyasi kursunun davamçısı olan Prezident İlham Əliyev tərəfindən uğurla davam etdirilir. Bu gün Azərbaycan müstəqil, güclü və inkişaf edən dövlət kimi dünya miqyasında tanınır. Prezident İlham Əliyevin rəhbərliyi ilə ölkəmiz siyasi, iqtisadi və hərbi sahələrdə böyük nailiyyətlər qazanıb. Azərbaycanın ərazi bütövlüyünün təmin olunması, beynəlxalq layihələrdə fəal iştirakı, enerji və nəqliyyat sahəsində mühüm mövqeyi ölkəmizin müstəqilliyinin Prezident İlham Əliyev tərəfindən daha da möhkəmləndirildiyini göstərir”.
Deputat sonda vurğulayıb ki, 28 May - Müstəqillik Günü Azərbaycan xalqının milli azadlıq mübarizəsinin zirvəsi və müasir dövlətçiliyimizin təməlidir. Azərbaycan Xalq Cümhuriyyəti qısa müddət mövcud olsa da, xalqımızın tarixində silinməz iz qoyub.
Bölmənin digər xəbərləri
