WUF13 qlobal şəhərsalma məsələlərində dünya ölkələrini daha məsuliyyətli olmağa təşviq etdi- ŞƏRH
Bakı, 23 may, AZƏRTAC
Ümumdünya Şəhərsalma Forumunun 13-cü Sessiyasının (WUF13) Azərbaycanda keçirilməsi ölkəmiz üçün mühüm beynəlxalq və siyasi hadisədir. Tədbirin miqyasını və əhəmiyyətini bura qatılan 57 mindən çox xarici qonağın, o cümlədən dünya liderlərinin, dövlət xadimlərinin, nüfuzlu siyasətçilərin, iş adamlarının və sahə ekspertlərinin iştirakı aydın nümayiş etdirir.
Bu sözləri AZƏRTAC-a açıqlamasında politoloq Zaur Məmmədov söyləyib.
O bildirib ki, WUF13-ün ən mühüm siyasi dividendlərindən biri Azərbaycan hökumətinin xarici qonaqları işğaldan azad edilmiş ərazilərdə aparılan genişmiqyaslı quruculuq işləri ilə yaxından tanış etmək imkanı qazanması oldu. Tədbir çərçivəsində təkcə paytaxt Bakının inkişafı deyil, həm də Qarabağ və Şərqi Zəngəzurun 30 illik işğal dövründə məruz qaldığı vandalizm aktları, dağıdılmış şəhər və kəndlərimiz barədə faktlar dünya ictimaiyyətinə çatdırıldı. Eyni zamanda, postmünaqişə dövründə həmin ərazilərdə qısa müddətdə həyata keçirilən sürətli abadlıq və müasir yenidənqurma layihələri barədə ətraflı məlumat verildi. Bu platforma sayəsində xarici qonaqlar Cənubi Qafqazın reallıqları ilə yerində tanış olmaq, regionda kimin dağıdıcı, kimin isə qurucu missiya daşıdığını öz gözləri ilə görmək imkanı əldə etdilər.
“Prezident İlham Əliyevin WUF13 çərçivəsində xarici qonaqlarla, müxtəlif dövlət başçıları və siyasətçilərlə keçirdiyi ikitərəfli və çoxtərəfli görüşlər mühüm nəticələrlə yaddan qaldı. Bu müzakirələrdə Azərbaycanın xarici siyasət prioritetlərinə dair fundamental razılaşmalar əldə olundu. Xüsusilə enerji təhlükəsizliyi və neft-qaz sahəsi diqqət mərkəzində idi. Təbii qazı boru kəmərləri vasitəsilə birbaşa nəql edən regional güc kimi Azərbaycan bu gün Avropanın enerji təhlükəsizliyində və şaxələndirilməsində kritik rol oynayır. Həmçinin WUF13 çərçivəsində Azərbaycan qazının Avropa bazarlarına daha geniş və etibarlı şəkildə ixracının davam etdirilməsi istiqamətində mühüm strateji dəqiqləşdirmələr aparıldı”, - deyə Z.Məmmədov əlavə edib.
Politoloq qeyd edib ki, Azərbaycan növbəti dəfə qlobal tədbirlərin yüksək səviyyədə təşkili üzrə dünyada ən uğurlu ölkələrdən biri olduğunu sübut etdi. BMT Baş katibinin müavininin və digər yüksəkçinli rəsmilərin tədbirdə fəal iştirakı da bunun bariz nümunəsidir.
WUF13-ün miqyasındakı sıçrayış Bakı sessiyasının tarixi uğuru kimi qeyd edilməlidir. Belə ki, əvvəlki forumlarda iştirakçı sayı orta hesabla 15-20 min nəfər təşkil edirdisə, Bakı Sessiyasında bu göstərici rekord həddə çatdı. Bu böyük fərq WUF13-ün qlobal miqyasda nüfuzunun artdığını və Bakının beynəlxalq dialoq mərkəzi kimi cəlbediciliyini göstərir.
“WUF13 həm də qlobal şəhərsalma məsələlərində dünya ölkələrini daha məsuliyyətli olmağa təşviq edərək bu sahəyə yeni baxış gətirdi. Əgər əvvəllər şəhərlər daha çox avtomobillərin hərəkəti üçün planlaşdırılırdısa, müasir yanaşmalarda əsas diqqət piyadalara, ekoloji tarazlığa və yaşıllaşdırmaya yönəlir. Bu "yaşıl və inklüziv şəhər" konsepsiyası hazırda Azərbaycanda da tətbiq olunmağa başlanıb. Həm paytaxtın inkişafında, həm də işğaldan azad edilmiş ərazilərdə icra edilən layihələrdə ekoloji uyğunluq, yaşıllaşdırma və piyadayönümlü infrastruktur yaxın gələcəyin əsas prioritet istiqamətlərindən biri olacaq. WUF13 Azərbaycan paytaxtında həm yerli, həm də xarici iştirakçılar üçün zəngin informasiya mübadiləsi və məhsuldar müzakirə platforması kimi yekunlaşdı. Xarici qonaqların yüksək rəyləri tədbirin missiyasını tam uğurla başa vurduğunu təsdiqləyir”, - deyə o əlavə edib.
Bölmənin digər xəbərləri
