Türkiyənin universitet rektoru: Türkiyə və Azərbaycanın uğurlarının təməli Çanaqqala və Qarabağda qoyulub
Çanaqqala təkcə “yenilməzlik” sinonimi deyil, həm də türk xalqının qətiyyətinin, şücaətinin və azadlığının rəmzidir. Əminəm ki, Qarabağ da Azərbaycan vətəndaşları üçün eyni dərəcədə əhəmiyyətlidir.
AZƏRTAC xəbər verir ki, bu fikri Ankara Musiqi və Təsviri Sənət Universitetinin (MGÜ) rektoru professor Erhan Özden bildirib.
O, iki ölkə xalqlarını birləşdirən qırılmaz əlaqələri vurğulayaraq, 1918-ci ildə Azərbaycana kömək edən Qafqaz İslam Ordusunun əsgərlərinin qəhrəmanlığını, eləcə də Çanaqqala döyüşündə vuruşan azərbaycanlıların şücaətini xatırladıb.
Erhan Özden əslən Ərzurumdandır və əcdadları bu şəhərə Gəncədən köçüblər. “Ərzurum sakinlərinin ləhcəsi Azərbaycan dilinə yaxındır, mədəniyyətlərimiz və adət-ənənələrimiz də oxşardır. Bir-birimizi yaxşı tanıyırıq. Türkiyə və Azərbaycan xalqları dəfələrlə təhdidlər qarşısında çiyin-çiyinə dayanıb, ağrı və sevinclərini bölüşüb”, -deyə rektor qeyd edib.
MGÜ rəhbəri “Çanaqqala” kəlməsinin hər bir Türkiyə vətəndaşı üçün rəmziliyini vurğulayıb və gəncləri şəhidlərin xatirəsini ehtiramla yad etməyə çağırıb.
“Zaman keçdikcə, ölkələrimiz inkişaf etdikcə, Türkiyə və Azərbaycanı uğurlara aparan yolun təməlinin qəhrəmanlıq dastanları yazılmış Çanaqqala və Qarabağda qoyulduğunu dərk etməliyik”, -deyə rektor vurğulayıb.
Ramin Abdullayev
Bölmənin digər xəbərləri
