TDT ölkələri ümumi daxili məhsulunun cəmi 2,1 trilyon dolları keçib
Astana, 13 may, AZƏRTAC
2025-ci ilin sonuna Türk Dövlətləri Təşkilatının (TDT) üzv və müşahidəçi dövlətlərinin ümumi ÜDM həcmi 2,1 trilyon dolları, ticarət dövriyyəsi isə 1,127 trilyon dolları keçib.
AZƏRTAC xəbər verir ki, bu rəqəmləri Azərbaycan Sahibkarlar Konfederasiyasının prezidenti Məmməd Musayev Astanada keçirilən TDT ölkələrinin biznes forumunda açıqlayıb. O, TDT ölkələrinin əhalisinin 178 milyon nəfəri keçdiyini və bunun nəhəng iqtisadi potensialı təmsil etdiyini, həmçinin qlobal ÜDM-in 2,8 faizini və dünya ticarətinin 3,6 faizini təşkil etdiyini qeyd edib.
M. Musayev vurğulayıb ki, Türk dünyası təkcə böyük deyil, həm də sürətlə inkişaf edən iqtisadi məkandır. 2025-ci ildə Qırğızıstan iqtisadiyyatı 11,1 faiz, Özbəkistan iqtisadiyyatı 7,7 faiz, Qazaxıstan iqtisadiyyatı 6,5 faiz, Türkmənistan iqtisadiyyatı 6,3 faiz, Türkiyə iqtisadiyyatı 3,2 faiz və Azərbaycanın iqtisadiyyatı 1,4 faiz artıb. Bu rəqəmlər göstərir ki, türk dövlətləri qlobal iqtisadi qeyri-müəyyənlik qarşısında da dinamik inkişaf trayektoriyasını qoruyub saxlayır.
Konfederasiya rəhbəri qeyd edib: “Bu gün biz təkcə iqtisadi əməkdaşlığı deyil, həm də ortaq tarixə, mədəniyyətə və gələcəyə əsaslanan daha böyük Türk dünyası üçün iqtisadi vizyonu müzakirə edirik”.
Bölmənin digər xəbərləri
