“TEHRAN-TAYMS” QƏZETİNDƏ HEYDƏR ƏLİYEVİN HƏYAT VƏ FƏALİYYƏTİNƏ DAİR MƏQALƏ DƏRC EDİLMİŞDİR
AZƏRTAC-ın xüsusi müxbiri xəbər verir ki, İranın ən nüfuzlu qəzetlərindən sayılan “Tehran-tayms” Azərbaycan xalqının ümummilli lideri Heydər Əliyevin həyat və fəaliyyətinə dair ingilis dilində bir səhifəlik məqalə dərc etmişdir.
Məqalədə ulu öndər Heydər Əliyevin keçdiyi zəngin həyat yolu dərindən təhlil edilmiş, Azərbaycan-İran münasibətlərinin inkişafına dair tarixi məqamlar barədə geniş və hərtərəfli məlumatlar verilmişdir. Bundan başqa, Heydər Əliyevin İranın ali rəhbəri Seyid Əli Xameneyi və bu ölkənin digər tanınmış şəxsləri ilə birgə fotoşəkilləri dərc edilmişdir.
Məqalədə göstərilir ki, Azərbaycan-İran münasibətlərində qarşılıqlı etimadın yaranmasında Heydər Əliyevin tarixi fəaliyyəti inkarolunmaz həqiqətdir. Ulu öndərin müəyyən etdiyi mehriban qonşuluq və dostluq siyasəti öz bəhrəsini vermişdir. Hazırda Azərbaycanla İran arasında əməkdaşlıq əlaqələri durmadan genişlənir.
Azərbaycanda hökm sürən ictimai-siyasi sabitlik ölkənin sürətli inkişafına təkan vermişdir. Bütün bunların nəticəsidir ki, son illər Azərbaycan Respublikasında əldə olunan iqtisadi dirçəliş nəticəsində dövlət büdcəsi bir neçə dəfə artmış, əhalinin sosial rifahı nəzərəçarpacaq dərəcədə yaxşılaşmış, infrastruktur yeniləşdirilmiş, bütün şəhər və kəndlərdə quruculuq və bərpa işlərinə start verilmişdir.
Bölmənin digər xəbərləri
