TELEVİZİYA ƏMƏKDAŞLARININ DÖYÜLMƏSİ FAKTI PİSLƏNİLMİŞDİR
AZƏRTAC xəbər verir ki, sentyabrın 30-da Milli Televiziya və Radio Şurasının növbəti iclası keçirilmişdir. Şuranın sədri Nuşiravan Məhərrəmov ABŞ-da ictimai televiziyanın təşkili, onun qanunvericilik bazası, proqram konsepsiyası və maliyyə qaynaqları barədə ətraflı məlumat verərək, bu təcrübənin yaxın gələcəkdə Azərbaycanda ictimai televiziyanın yaradılması baxımından faydalı ola biləcəyini söyləmişdir.
İclasda “ATV” kanalı əməkdaşların P.S.S. mühafizə şirkətinin cangüdənləri tərəfindən döyülməsi faktına münasibət bildirilərək xüsusi bəyanat qəbul olunmuşdur. Bəyanatda deyilir: “Milli Televiziya və Radio Şurası sentyabrın 26-da türk müğənnisi Seda Sayanın “Şəfa” stadionunda keçirilən konsertindən reportaj hazırlayan “ATV” telekanalı əməkdaşlarının P.S.S mühafizə şirkətinin cangüdənləri tərəfindən döyülməsi faktını qətiyyətlə pisləyərək, bu cür özbaşınalıq hərəkətlərinin yolverilməz olduğunu bildirir. Öz peşə borcunu icra edərkən jurnalist kadrlarının hüquqlarının belə kobud şəkildə pozulduğundan təəssüflənən Teleradio Şurası əmin olduğunu bildirir ki, respublikanın hüquq mühafizə orqanları baş vermiş hadisə ilə bağlı müvafiq araşdırmalar apararaq, günahkarların cəzalandırılması üçün zəruri tədbirlər görəcəklər”.
İclasda Teleradio Şurasının fəaliyyəti ilə bağlı bir sıra cari məsələlər də nəzərdən keçirilmişdir.
Bölmənin digər xəbərləri
